Samkeppniseftirlitið tók í dag bráðabirgðaákvörðun þar sem Isavia ohf. er gert að stöðva tímabundið gjaldtöku á ytri rútustæðum (fjarstæðum) við Flugstöð Leifs Eiríkssonar. Gjaldtakan tók gildi þann 1. mars 2018, í framhaldi af útboði og samningum um nýtingu tveggja hópferðafyrirtækja á stæðum við flugstöðvarbygginguna (nærstæði).
Kvörtun barst frá fyrirtækinu Gray Line, sem missti aðstöðu á nærstæðunum í útboði í fyrra. Hópferðir og Kynnisferðir áttu hæstu boðin, en síðara fyrirtækið er í eigu foreldra og frændfólks Bjarna Benediktssonar, fjármála- og efnahagsráðherra.
„Upphæðin er 20 þúsund á hvern bíl, sem er náttúrulega dýrasta bílastæðagjald í heimi,“ segir Þórir Garðarsson, stjórnarformaður Gray Line. „Við ætluðum bara að halda áfram okkar starfsemi á bílastæðunum þar sem allir hafa verið í samkeppni, en væntanlega telja einhverjir að það séu tengsl við útboðið.“
Málið þoldi ekki bið
Samkeppniseftirlitið telur að háttsemi Isavia gangi gegn ákvæðum samkeppnislaga og tekur bráðabirgðarákvörðun þar sem málið þolir ekki bið eftir endanlegri ákvörðun. Eftirlitið telur sennilegt að Isavia hafi misnotað markaðsráðandi stöðu sína með óhóflegri verðlagningu við gjaldtöku fyrir notkun á fjarstæðum. Jafnframt mismuni Isavia viðskiptavinum í verðlagningu og skilmálum. Gildir bráðabirgðaákvörðunin til 31. desember 2018.
„Verði ekkert að gert muni gjaldtaka Isavia á fjarstæðum hafa veruleg skaðleg áhrif á rekstur fyrirtækja sem nýta þurfi fjarstæðin,“ segir í tilkynningu Samkeppniseftirlitsins. „Þá liggur fyrir að gjöld vegna stæðanna munu að óbreyttu hækka verulega þann 1. september nk., en þá verður svokallaður afsláttur á aðlögunartímabili felldur niður.“
Samkeppniseftirlitið hefur sent Isavia andmælaskjal þar sem félaginu er gefinn kostur á að koma sjónarmiðum og andmælum á framfæri áður en endanleg ákvörðun verður tekin í málinu.
Óánægja Strætó með stæðin
Engar merkingar eru innan Leifsstöðvar sem benda komufarþegum á almenningssamgöngur. Stoppistöð Strætó við Keflavíkurflugvöll hefur verið færð frá útgangi komufarþega, þar sem hópbifreiðar einkaaðila eru staðsettar, og er nú brottfararmegin.
Forsvarsmenn Strætó hafa óskað eftir því við Isavia að ferðamönnum sé bent á vagnana til jafns við rútur og leigubíla. Í samtali við Stundina í janúar sagði upplýsingafulltrúi Strætó að slíkar merkingar yrðu settar upp á fyrstu mánuðum ársins. Merkingarnar eru ekki komnar upp.
„Einhver upplýsingagjöf væri vel þegin, sama hver hún er.“
„Í þau skipti sem við höfum rætt við Isavia hefur þessu verið lofað,“ segir Guðmundur Heiðar Helgason, upplýsingafulltrúi Strætó. „En ekkert hefur verið gert. Einhver upplýsingagjöf væri vel þegin, sama hver hún er. Við værum til í að það væri hægt að vísa fólkinu á réttan stað. Það eru margir sem vita ekkert hvar stöðin er staðsett. Þeir töluðu áður um að hafa smá skilti fyrir utan, en það hefur ekki verið gert ennþá.“
Guðjón Helgason, upplýsingafulltrúi Isavia, segir að merkingarnar verði bættar. Verkefnið hafi hins vegar tafist vegna annarra verkefna í Leifsstöð og sumarfría starfsfólks. „Mér er sagt að haustið fari í uppsetningu, ég var fullvissaður um að þetta væri í vinnslu,“ segir Guðjón.
Athugasemdir