Helgi Hrafn Gunnarsson, þingmaður Pírata, gefur lítið fyrir gagnrýni á kollega sína sem kemur fram í nafnlausu áróðursmyndbandi á Facebook. 

Í myndbandinu sem birtist á síðunni Kosningar er rifjað upp hvernig Jón Þór Ólafsson hefur titlað sig stjórnmálafræðing, heimspeking og stjórnmálaheimspeking og Smári McCarthy titlað sig stærðfræðing án þess að þeir hafi útskrifast með slíkar gráður úr háskóla. 

„Mér var druuuullusama þegar fréttahrinan byrjaði um að Sigmundur Davíð hefði verið titlaður skipulagsfræðingur og er drullusama nú,“ skrifar Helgi á Facebook og vísar þannig til umræðu um hvernig fyrrverandi forsætisráðherra varð margsaga um menntun sína og var ítrekað titlaður sem doktor í skipulagsfræðum frá Oxford án þess að hafa lokið doktorsprófi.

Helgi segist ekki hafa mikið út á að setja að áróðurinn sé nafnlaus nema í samhengi við lög um fjármögnun stjórnmálaflokka og kosningabaráttu.

„Homminn í hommafóbíska samfélaginu þarf að geta tjáð sig nafnlaust. Mér finnst stærsta vandamálið vera hvað fólk er almennt ginkeypt fyrir þvættingi og gjarnt á að elta eitthvað sem skiptir ekki máli. Ef fólk væri bara aðeins meira til í að velta fyrir sér hvers vegna hvað skiptir máli, og miklu minna til í að láta einföld skilaboð um flókna hluti ráða skoðunum sínum, þá væri ekkert tiltökumál að fólk skrifaði einhverja útúrsnúningu undir nafnleynd,“ skrifar hann á Facebook. 

Katrín Jakobsdóttir forsætisráðherra skipaði nýlega nefnd um endurskoðun laga um fjármál stjórnmálasamtaka og  upplýsingaskyldu þeirra, en nefndinni er einnig ætlað að finna leiðir til að takast á við nafnlausan áróður. „Ég óskaði eftir því að nefndin fengi lengri tíma til að vinna að tillögum að leiðum til að koma vörnum við gegn nafnlausum áróðri, hliðarkennitölum og sjálfskipuðum hópum sem vaða uppi með hatursáróður og falsfréttir í tengslum við stjórnmálin og kosningar,“ sagði Björg Eva Erlendsdóttir, formaður nefndarinnar,  í viðtali við Stundina á dögunum. 

Nafnlaus og kostaður kosningaáróður á samfélagsmiðlum var óvenju umfangsmikill í aðdraganda síðustu tveggja Alþingiskosninga, einkum efni frá síðunum Kosningar 2016 og Kosningar 2017. Nú virðast sömu aðilar aftur komnir á kreik, en nýjasta myndbandið fjallar um þingmenn Pírata og menntun þeirra. 

Eins og Stundin greindi frá 4. nóvember síðastliðinn sá hver Íslendingur að meðaltali tvö áróðursmyndbönd frá nafnlausa auglýsandanum Kosningar 2017 með leynilegri fjármögnun á YouTube fyrir síðustu kosningar. Það segir aðeins brot af sögunni, því að meðaltali hefur áróðursmyndband verið spilað fjórum til fimm sinnum á hvern Íslending af sömu aðilum á Facebook, eða vel yfir milljón sinnum. Þannig má gera ráð fyrir því að meðal-Íslendingur hafi séð leynilega fjármögnuð áróðursmyndbönd frá þessum eina aðila minnst fimm sinnum í aðdraganda alþingiskosninga á landinu á rúmu ári.

Þingmenn fjög­urra stjórn­mála­flokka hafa lagt fram beiðni um skýrslu frá Katrínu Jak­obs­dóttur for­sæt­is­ráð­herra þar sem afhjúpað verði hverjir stóðu að áróðrinum og hvernig viðkomandi aðilar tengdust stjórnmálasamtökum.