Ritstjórn Stundarinnar fékk Blaðamannaverðlaun ársins 2017 fyrir ítarlega umfjöllun um uppreist æru kynferðisbrotamanna, áhrif þess á fórnarlömb mannanna og tregðu stjórnvalda til upplýsingagjafar. Umfjöllunin var að mati dómnefndar vönduð, yfirgripsmikil og heildstæð.
Við sama tækifæri fékk Heiða Helgadóttir ljósmyndari Stundarinnar tvenn verðlaun, annars vegar fyrir myndaröð ársins um samfélag heimilislausra í Laugardal, sem hægt er að sjá hér: Reykjavík 104,5: Íslenska flóttafólkið í Laugardalnum. Fékk hún einnig verðlaun fyrir portrait ársins, fyrir mynd af Sylviane Lecoultre Pétursson.
Um leið og verðlaunin voru veitt opnaði árleg sýning íslenskra blaðaljósmyndara í Esju, austurhluta Hörpu. Veitt voru verðlaun í 7 flokkum auk bestu myndar ársins. Mynd ársins 2017 tók Stefán Karlsson, ljósmyndari Fréttablaðsins og er það mynd afNínu Rún Bergsdóttur sem situr í stól húðflúrara sem er að flúra „I am the storm“ á öxl Nínu. Hún er þar ásamt konum sem allar fengu sér sama húðflúrið og höfðu allar orðið fyrir kynferðislegu ofbeldi af hálfu sama manns. Myndin er á margan hátt táknræn fyrir árið 2017 því reynsla þeirra kom af stað hreyfingu sem fékk heitið „Höfum hátt“.
Sem fyrr segir voru verðlaun Blaðamannafélags Íslands einnig veitt í Hörpu í dag. Alls voru veitt verðlaun í fjórum flokkum og fóru tvenn verðlaun til RÚV, fyrir viðtal ársins og rannsóknarblaðamennsku ársins.
Verðlaunahafar og rökstuðningur dómnefndar var eftirfarandi:
Viðtal ársins
Viktoría Hermannsdóttir, RÚV,
fyrir viðtal við Árna Jón Árnason í þættinum Á ég bróður á Íslandi?
Viðtalsþáttur Viktoríu er unninn af fagmennsku og góðri tilfinningu fyrir efniviðnum. Í viðtalinu eru hlustendur teknir með í spennandi ferð sem hefst með leit Bandaríkjamannsins David Balsam að bróður sínum hér á landi. Bróðirinn finnst og heitir Árni Jón Árnason.
Í áhrifamiklu viðtali nær Viktoría að draga fram hægláta persónu Árna, sem ekki hefur krafist þess að taka mikið pláss í lífinu. Sambandi Árna við móður sína og systkini hér á á landi er vel lýst, sem og áhrifum þess að alast upp sem ástandsbarn. Um þann hluta hernámsins á Íslandi hefur ekki verið mikið fjallað og er viðtalið frábær viðbót við hina vönduðu þáttaröð, Ástandsbörn, sem Viktoría gerði einnig á síðasta ári.
Umfjöllun ársins
Sunna Ósk Logadóttir, Morgunblaðinu,
fyrir umfjöllun ársins með greinarflokknum Mátturinn eða dýrðin
Sunna varpaði skýru ljósi á þá stöðu sem uppi er á raforkumarkaði hér á landi. Í greinaflokknum Mátturinn eða dýrðin sést hvernig sífellt fleiri togast á um náttúruauðlindirnar sem eru af skornum skammti. Bent var á áhrif breyttra neysluvenja landsmanna með rafbílavæðingu og að eftirspurn fyrirtækja eftir raforku væri nú meiri en hægt er að afgreiða.
Um leið og þróun þessarar umræðu kom vel fram var bent á hvernig núverandi staða kallar á aðgerðir til að auka orkuframboð eða draga úr notkuninni. Sunna ræddi við tugi manna um stöðuna: íbúa, náttúruverndarsinna, virkjanaaðila, forsvarsmenn stofnana og aðra sem hafa hagsmuni og skoðanir á málinu. Málefnið er mikilvægt, framsetningin skýr og greinargóð, byggð á heimildum sem sóttar voru víða.
Rannsóknarblaðamanneska ársins
Alma Ómarsdóttir, RÚV,
fyrir rannsóknarblaðamennsku í umfjöllun um uppreist æru
Umfjöllun Ölmu um uppreist æru var heildstæð, þar sem allar hliðar málsins voru kannaðar. Rætt var við fulltrúa aðila sem sótt hafði um uppreist æru, konur sem brotið hafði verið gegn og aðstandendur þeirra og ferli umsóknar útskýrt.
Í samskiptum sínum við framkvæmdavaldið, sem ber ábyrgð á ferlinu, kom Alma hins vegar að lokuðum dyrum, þar sem neitað var að veita upplýsingar um hverjir hefðu fengið samþykktar umsóknir og hverjir veitt hefðu meðmæli með slíkum umsóknum. Ölmu tókst, meðal annars með kæru til Úrskurðarnefndar um upplýsingamál, að tryggja að öll gögn kæmust upp á yfirborðið og dró þannig fram nýjar upplýsingar sem skiptu verulegu máli fyrir almenning.
Blaðamannaverðlaun ársins
fær ritstjórn Stundarinnar fyrir umfjöllun um uppreist æru
Umfjöllun Stundarinnar um uppreist æru var vönduð, yfirgripsmikil og heildstæð. Samhliða ítarlegum fréttaskýringum birtust í upphafi umfjöllunarinnar áhrifarík viðtöl Áslaugar Karenar Jóhannsdóttur við fórnarlömb Róberts Downey sem sýndu mikla næmni fyrir umfjöllunarefninu.
Stundin lagði af mörkum mikla frumkvæðisvinnu í þessu máli og greindi fyrst miðla frá því að annar kynferðisbrotamaður, Hjalti Sigurjón Hauksson, hefði fengið uppreist æru samtímis Róbert og að til þess hefði Hjalti hlotið meðmæli frá föður þáverandi forsætisráðherra. Sú uppljóstrun Stundarinnar átti eftir að draga verulegan dilk á eftir sér sem endaði með stjórnarslitum og kosningum.
Athugasemdir