Nafn: Þórdís Aðalsteinsdóttir.
Fæðingardagur og ár: 25. október 1975.
Starf: Myndlistarmaður.
Spurningar:
1. Hvað er það skemmtilegasta sem þú gerir?
Það skemtilegasta er auðvitað að láta tala við mig í fleirtölu. Fast á eftir fylgir skemmtunin að liggja í rúminu. Þar má mála, lesa, skrifa og vinna í samböndum og samskiptum, að ógleymdu því að fá hugljómun milli svefns og vöku. Auk þess þykir mér skemmtilegt að finna steina, spýtur og smádrasl sem einhver hefur troðið í töskur, vasa og veski hjá mér.
2. Líf eftir þetta líf?
Já, kannski þannig að líkamar brotni niður og frumurnar endurbyggist í eitthvað nýtt, og að gen og frumur, eða hvað það má kallast, hafi minni og muni andardrátt og upphaf alheimsins, en ég skil ekki að hverju þau eru að keppast. Næsta kynslóð mun finna út úr því.
3. Hvað er það neyðarlegasta sem þú hefur lent í?
Kannski þegar ég bjó til skúlptúr fyrir skúlptúrgarð í NYC. Reiður maður braut typpið af skúlptúrnum og tók það með sér. Ég var í Taílandi en tveir drengir settu á styttuna nýtt typpi, smágert en í fullri reisn. (Það var áður þykkt en værðarlegt). Þá varð allt vitlaust yfir hvað þetta væri mikill hryllingur, en hægði loks um þegar há girðing var reist í kringum skúlptúrinn. Nú liggur styttan í skúr hjá pikklugerðarmanni.
4. Ertu pólitísk?
Nei, ég er í uppgjöf.
5. Trúirðu á tilviljanir?
Já, því ekki það? Ég sé eftir einhverjum atvikum þar sem ég hefði átt að fylgja hugboði og koma í veg fyrir tilviljanir, en þær hafa líka verið frábærar margar og betri en nokkur plön.
6. Ef þú ættir eina ósk sem myndi örugglega rætast, hver væri hún?
Að Jökulsá á Fjöllum væri freyðivínsá.
„Ástin er eitthvað sem ég er sérfræðingur í og sérfræðiþekking mín hefur hlotið góðar undirtektir“
7. Ef þú gætir breytt einhverju sem þú hefur gert, hverju myndirðu breyta?
Ég myndi breyta svarinu við spurningunni hér á undan, (en vonandi væri það ekki í boði) og óska þess að mannfólk gæti ekki verið illgjarnt eða gráðugt, og þess að dýr yrðu gerð að heiðursborgurum.
8. Hverju myndirðu breyta á Íslandi ættirðu þess kost?
Úff, það þyrfti að byrja bara frá grunni aftur, reka alla ráðamenn og ríkisstjórn og koma á öðru skipulagi. Setja í forgang umhverfismál, rafbílavæða og bæta hjólamenningu, setja stolt okkar í að skapa umhverfisvænt og hreint land. Koma í veg fyrir einkavæðingu og koma vel fram við dýr.
9. En í heiminum?
Ég mundi breyta því sama og í sjöundu spurningu.
10. Ef þú skrifaðir ljóðabók, hvaða nafn gæfirðu henni?
Portúgal eða Aukinn skilningur á ljóðum.
Ef það má bara velja einn titil þá set ég aukinn skilning sem undirtitil.
11. Hver er afstaða þín til flóttamanna?
Engin landamæri, engin vegabréf.
12. Hvaða dýr myndirðu vilja vera fengirðu tækifæri til þess?
Gíraffamóðir með gíraffabarn, það er löngu ákveðið.
13. Segðu okkur eitthvað um ástina og byrjaðu setninguna svona: ÁSTIN ER …
Ástin er eitthvað sem ég er sérfræðingur í og sérfræðiþekking mín hefur hlotið góðar undirtektir og mikinn stuðning nákominna.
Athugasemdir