Héraðssaksóknari hefur gefið út ákæru á hendur Eimskipafélagi Íslands og Eimskip Ísland ehf. vegna sölu og förgunar skipanna Laxfoss og Goðafoss, sem enduðu við niðurrif á Alang-strönd á Indlandi.
Málið kom upp þegar fjallað var um það í fréttaskýringaþættinum Kveik á RÚV. Í kjölfarið kærði Umhverfisstofnun málið til lögreglu árið 2020, þar sem grunur vaknaði um brot á reglum um útflutning úrgangs og meðferð skipa sem fara í niðurrif.
Í ákærunni er þess krafist að félögin verði dæmd til refsingar og greiðslu sakarkostnaðar. Þetta kemur fram í tilkynningu Eimskips til kauphallarinnar.
Á sama tíma hefur héraðssaksóknari fellt niður rannsókn á framkvæmdastjóra rekstrarsviðs Eimskips í tengslum við málið. Með þeirri ákvörðun lýkur málinu gagnvart honum án ákæru.
Eimskip heldur því fram að félagið hafi fylgt lögum og reglum við sölu skipanna, sem hafi verið seld til áframhaldandi rekstrar en ekki sérstaklega til endurvinnslu. Félagið segist munu verja mál sitt fyrir dómstólum.
Eimskip seldi skipin Laxfoss og Goðafoss til fyrirtækisins GMS, sem sérhæfir sig í að vera milliliður við förgun skipa, í desember árið 2019. Þeim var síðan siglt beint úr þjónustu Eimskips til niðurrifs á Alang-strönd við Indland í maí ári síðar.
Alang-strönd á Indlandi er ein stærsta skipaniðurrifsstöð heims og hefur ítrekað verið gagnrýnd vegna umhverfis- og öryggismála.
Á myndböndum sem birt voru á samfélagsmiðlum mátti sjá hvar Laxfoss var siglt í strand fljótlega eftir að heimahöfn þess var færð frá Þórshöfn til Monróvíu.
Athugasemdir