Forstjóri Alphabet, móðurfélags Google, hefur varað við því í viðtali við BBC að öll fyrirtæki myndu finna fyrir áhrifunum ef gervigreindarbólan springur.

Sundar Pichai viðurkenndi að uppsveiflan í fjárfestingumí gervigreind væri  „órökrétt“. Hún hefur ýtt undir hækkun á tæknimarkaði á þessu ári.

En ótti við að gervigreindarbólan gæti sprungið hefur leitt til söluhrinu hlutabréfa og valdið lækkunum á alþjóðlegum hlutabréfamörkuðum undanfarna mánuði.

Þegar Pichai var spurður hvort Google myndi finna fyrir áhrifunum ef gervigreindarbólan springur, sagði hann við BBC: „Ég held að ekkert fyrirtæki verði ónæmt, þar á meðal við.“

Í viðtalinu, sem birt var seint í gær, var fjallað um langvarandi áhyggjur af gervigreind, þar á meðal orkuþörf, minnkandi loftslagsmarkmið, nákvæmni og áhrif gervigreindar á störf.

Pichai varaði við „gríðarlegri“ orkuþörf gervigreindar, sem nam 1,5 prósentum af raforkunotkun heimsins á síðasta ári, samkvæmt Alþjóðaorkumálastofnuninni.

Alþjóðlegt tölvufótspor gervigreindar gæti náð 200 gígavöttum fyrir árið 2030 – sem jafngildir árlegri raforkunotkun Brasilíu – og helmingur þess í Bandaríkjunum.

Pólitísk spenna hefur ýtt undir tækniæði við að byggja risavaxin gagnaver sem hýsa tugþúsundir örgjörva sem krefjast ótrúlegs magns af raforku og stórfelldrar kælingar.

Pichai sagði að aðgerða væri þörf til að þróa nýja orkugjafa og styrkja innviði.

Tækniforstjórinn viðurkenndi einnig að orkuþörf gervigreindarstarfsemi Alphabet myndi seinka loftslagsmarkmiðum fyrirtækisins, en fullyrti að fyrirtækið stefndi enn að kolefnishlutleysi fyrir árið 2030.

Gervigreind mun einnig hafa áhrif á vinnu eins og við þekkjum hana, sagði hann.

Pichai sagði að hún myndi valda „samfélagslegum truflunum,“ jafnvel hugsanlega koma í stað forstjóra, og „fólk verði að aðlagast.“

Hann fullyrti að þeim sem aðlagast gervigreind „mun vegna betur.“

„Það skiptir ekki máli hvort þú vilt verða kennari eða læknir. Allar þessar starfsgreinar munu enn vera til, en fólkið sem mun standa sig vel í hverri þessara starfsgreina er fólk sem lærir að nota þessi verkfæri.“

Alphabet tilkynnti um fyrstu 100 milljarða dala ársfjórðungstekjur sínar í október, sem fyrirtækið sagði að væru studdar af getu þess til að nýta sér gervigreindaruppsveifluna.

Tæknirisinn hefur aukið útgjöld til að mæta eftirspurn eftir gervigreindarinnviðum og ýtt undir alþjóðlega innleiðingu á gervigreindareiginleikum í Google Search og Gemini gervigreindarlíkönum fyrirtækisins.