Donald Trump, forseti Bandaríkjanna, hótaði í dag að leggja háa tolla á kvikmyndir sem framleiddar eru utan Bandaríkjanna og hélt því fram að iðnaði landsins hefði verið „stolið“.

Ummæli Trumps koma skömmu eftir að hann hótaði fjölda nýrra tolla sem á að leggja á í þessari viku lyf, húsgögn og þungaflutningabíla.

Í dag beindi Trump athygli sinni aftur að kvikmyndaiðnaðinum og sakaði í færslu á Truth Social önnur lönd um að hafa tekið viðskipti frá Bandaríkjunum, „eins og að stela nammi af barni.“

Hann gagnrýndi Gavin Newsom, ríkisstjóra Kaliforníu, fyrir að vera „veikur og vanhæfur“ og bætti við að ríkið hefði orðið fyrir miklum áhrifum.

„Til að leysa þetta langvarandi, endalausa vandamál mun ég leggja 100% toll á allar kvikmyndir sem eru framleiddar utan Bandaríkjanna,“ skrifaði Trump.

Hann gaf ekki frekari upplýsingar um áætlanir sínar eða tímaramma fyrir hvenær þessir tollar gætu tekið gildi.

Nýjasta færsla Trumps endurómar hótun sem hann setti fram í maí, þegar hann sagði að bandaríski kvikmyndaiðnaðurinn væri „að deyja mjög hratt.“

Þá sagðist hann vera að heimila viðskiptaráðuneytinu og viðskiptafulltrúa Bandaríkjanna að hefja ferlið við að koma á 100 prósenta tolli.

Afleiðingarnar fyrir kvikmyndaiðnaðinn eru enn óljósar.

Hollywood er veigarmikill geiri í bandarísku efnahagslífi, sem skapaði meira en 2,3 milljónir starfa og 279 milljarða dala í sölu árið 2022, samkvæmt gögnum frá Motion Picture Association.

En í kjölfar verkfalla í Hollywood og Covid-faraldursins – sem olli því að Bandaríkjamenn kusu að horfa á kvikmyndir heima í stað þess að fara í kvikmyndahús – hefur iðnaðurinn átt í erfiðleikum með að ná aftur skriðþunga, að sögn innherja í iðnaðinum í samtali við AFP.

Í færslum Trumps var ekki minnst á hvort sjónvarpsþættir, sem eru sífellt arðbærari og vinsælli framleiðslugrein, yrðu fyrir áhrifum.

Á fimmtudag sagði Trump að hann myndi leggja sérstaka tolla á bilinu 25 til 100 prósent á lyf, eldhúsinnréttingar, bólstruð húsgögn og þungaflutningabíla.

Þeir áttu að taka gildi á miðvikudag, bætti hann við, og einkaleyfisvarin lyf myndu sæta 100 prósenta tollum nema fyrirtæki væru að byggja verksmiðjur í Bandaríkjunum.

Trump ítrekaði hótun sína varðandi innflutt húsgögn og sagði að Norður-Karólína „hafi algjörlega misst húsgagnaviðskipti sín til Kína og annarra landa.“