Fjórtán með fölsuð skilríki – Óvenjulegt mál og mansal til skoðunar

Fjórtán manns frá Asíu hafa frá því í lok ágúst­mán­aðar verið stöðvuð á Kefla­vík­ur­flug­velli með fölsuð skil­ríki. Fólkið er ekki í gæslu­varð­haldi en má hvorki koma inn í landið né halda ferð sinni áfram. Þau eru því í úrræði á afmörk­uðu svæði sem lög­reglan getur fylgst með á grund­velli laga um útlend­inga og laga um landa­mæri.

Þetta stað­festir Ómar Annisius, aðstoð­ar­yf­ir­lög­reglu­þjónn á Kefla­vík­ur­flug­velli, í sam­tali við Heim­ild­ina. „Við erum enn að vinna í því að stað­festa auð­kenni þess­ara aðila. Það er verk í vinnslu. Við erum að von­ast eftir því að fá ein­hverja sam­vinnu frá þessum ein­stak­lingum til þess að aðstoða okkur við að bera kennsl.“

Blm: Er grunur um að þetta gæti verið man­sal?

„Við úti­lokum það alls ekki,“ segir Ómar.

Gefa upp rangt þjóðerni

Allir ein­stak­ling­arnir höfðu komið frá Asíu til Evrópu, inn á Schengen-svæðið þaðan sem þau ferð­uð­ust til Íslands og ætl­uðu sér að halda áfram til Kanada. „Þetta eru allt mis­mun­andi staðir innan Evrópu sem þetta fólk er að ferð­ast frá.“ 

Spurður nánar út í eðli skil­ríkj­anna segir Ómar þau vera frá ýmsum löndum – Suður-Kóreu, Japan og Taívan, til dæmis. 

Blm: Haldið þið að þau séu að villa á sér heim­ildir með til­liti til þjóð­ernis?

„Já,“ segir Ómar, sem vill ekki tjá sig um það hvort fólkið hafi verið í sam­floti. Þá segir hann enn ótíma­bært að segja í hvaða erinda­gjörðum ein­stak­ling­arnir voru.

Samkvæmt upp­lýs­ingum Heim­ild­ar­innar er um Kínverja að ræða. 

Gríðarlegt álag á lögregluna

Blm: Er ein­hver grunur um að það hafi verið stærri hópur – komust ein­hverjir í gegn?

„Ég get ekki stað­fest að svo stöddu að ein­hver hafi kom­ist í gegn. En við erum í sam­skiptum við Evr­ópu­lög­regl­una og önnur ríki til að reyna að ná betur utan um ástandið og sjá hvort þetta sé mögu­lega hluti af ein­hverju stærra verk­efni, ef svo má segja.“ 

Ómar segir aðspurður að málið sé óvenju­legt, málið eigi sér ekki for­dæmi. „Það er óvenju­legt að sjá svona marga koma á svona stuttum tíma, svo sann­ar­lega. Það sem er í raun sami áfanga­stað­ur­inn – Kanada í þessu til­felli. Þetta setur gríð­ar­legt álag á ákveðna inn­viði og á lög­regl­una. Þarna mæðir rosa mikið á að við þurfum að hafa úrræði til þess að geta tek­ist á við verk­efni af þess­ari stærð­argráðu.“

Hann bætir við að málið krist­alli mik­il­vægi þess að koma á ein­hvers konar úrræðum við landa­mærin þegar svona mál komi upp – en Ómar seg­ist sann­færður um að fleiri slík mál lendi á borði lög­reglu í fram­tíð­inni. „Það sem ég myndi mest vilja sjá – og lög­reglan – er að það væri ein­hvers konar vist­un­ar­úr­ræði á landa­mær­unum þar sem við gætum verið að hýsa ein­stak­linga sem fá ekki land­göngu og eru til skoð­unar.“

Fyrst að sjá núna að herjað sé á Ísland

Ómar bætir því við að lög­reglan á Suð­ur­nesjum, lög­reglan á höf­uð­borg­ar­svæð­inu og rík­is­lög­reglu­stjóri séu að vinna náið saman við úrlausn þessa máls. „Við erum líka í mjög góðum sam­skiptum við dóms­mála­ráðu­neytið.“ 

Spurður hvort hægt sé að setja málið í sam­hengi við alþjóð­lega þróun seg­ist Ómar telja að svona mál hafi verið við­var­andi í tölu­verðan tíma.

„Við erum kannski fyrst að sjá núna að það sé verið að herja svona grimmt á Ísland. Ísland er nátt­úru­lega þessi tengi­völlur við bæði Evrópu og Banda­ríkin. Þannig að þarna eru menn að reyna að koma sér í gegn og nýta sér flug­stöð­ina til að reyna að kom­ast á áfanga­stað. En við erum stað­ráðin í því að standa vakt­ina og erum að beita þeim mót­væg­is­að­gerðum sem við getum – við höldum bara áfram með okkar bar­áttu.“