Landsmenn létu veðrið ekki aftra sér og héldu þjóðhátíðardaginn hátíðlegan víða um land.
Á Austurvelli flutti forseti Íslands, Halla Tómasdóttir, ávarp og vakti máls á stöðu heimsmála. „Vitundin um krefjandi úrlausnarefni yfirgnæfir þó alls ekki trú mína á að þessir umbrotatímar færi okkur tækifæri til að standa okkur betur,“ sagði forseti.
„Þetta er ég sannfærð um því í starfi mínu er ég svo lánsöm að fá að umgangast ótal margt fólk sem stígur fram í nafni kærleikans,“ bætti hún við. „Það er úti um allt, ósérhlífna fólkið sem oft heyrist ekki hátt í en lætur gott af sér leiða á hverjum degi. Eins og ég hef áður sagt þá kýs ég að kalla þetta fólk riddara kærleikans og ég ítreka að það geta allir valið að vera í því liði.“
Reykvíkingar nutu svo lífsins í miðborginni, þrátt fyrir smá rigningu og var ljósmyndari Heimildarinnar viðstaddur til að festa hátíðarhöldin á filmu.
Athugasemdir