Ekki allir sem geta sagst hafa unnið Magnus Carlsen

Í mínum villt­ustu draumum hefði þetta ekki einu sinni gerst, liggur við. Það er ekki leið­in­legt að rifja þetta upp.“

Þetta segir hinn 22 ára Vignir Vatnar Stef­áns­son, stór­meist­ari í skák, um sigur sinn á fimm­falda heims­meist­ar­anum Magnusi Carlsen í hrað­skák – fyrstur Íslend­inga.

„Þetta er í fyrsta skipti sem ég tefli við hann. Ég hef alltaf fengið þessa spurn­ingu á mig: „Hefur þú teflt við Magnus?“ Og loks­ins fæ ég hann. Ég vissi að það yrði ein­hvern tíma, að það myndi ger­ast. En ég var ekki viss um hvenær. Maður fær ekki alltaf tæki­færi til þess,“ segir Vignir.

„Ótrúlegur maður“

Magnus Carlsen hefur verið met­inn bestur í skák­heim­inum í næstum 14 ár. „Hann er svo miklu betri en aðrir í dag að það er eig­in­lega djók,“ segir Vignir. Hann bætir við að Carlsen hafi nýlega komið af skák­móti í Þýska­landi þar sem næstum allir bestu skák­menn heims tóku þátt. „Hann vann mótið með níu af níu mögu­legum. Þannig að þetta er alveg ótrú­legur maður.“

Vignir Vatnar og Carlsen öttu kappi á viku­lega net­mót­inu Titled Tuesday, en þar keppa aðeins þeir sem eru með skák­titla og geta því talist mjög færir í skák. Vignir segir að á bil­inu 500–700 manns taki þátt í hverju móti. 

Hann útskýrir að það séu þó alltaf meiri líkur á að leggja Carlsen í hrað­skák. En þrátt fyrir tapið bar heims­meist­ar­inn sigur úr býtum á mót­inu. Reyndar tap­aði hann aðeins einni skák af ell­efu – þeirri gegn Vigni. „Hann tap­aði bara fyrir mér. Ég var hel­víti ánægður með það. Það gerði þetta enn þá betra, sem var eig­in­lega erfitt,“ segir hann.

Skákin gegn Carlsen telur Vignir að hafi staðið yfir í sjö til átta mín­útur. „Ég var bara glaður fyrst. Ég ætl­aði að leggja mig allan fram, en maður er aldrei lík­legur gegn Carlsen. En allt í einu fékk ég bara góða stöðu og þá byrj­aði stressið virki­lega að kikka inn. Ég var bara: „Ég gæti unnið“ og byrj­aði allur að titra á músinni. Ég held ég hafi nú bara dottið í kvíða­kast í beinni,“ segir Vignir. 

Eftir skák­ina segir hann að hann hafi hugsað með sér að þetta væri frá­bært en ekki velt sigrinum mikið fyrir sér.  „Síðan kíki ég á sím­ann minn og þá er bara allt á milljón – og það var bara hel­víti gaman.“

Heldur sínu striki

Hann tekur þó fram að lítið breyt­ist við þetta, þótt auð­vitað sé gott að hafa það undir belt­inu að hafa sigrað Carlsen. „Það eru ekki allir sem geta sagt það. Eftir að hann varð sá besti í heimi þá eru það ekki margir. Það eru bara bestu skák­menn heims.“ Hann skýrir að Carlsen tapi eitt­hvað inn á milli, en hann geri þó lítið af því.

Sjálfur hyggst stór­meist­ar­inn ætla að halda sínu striki sem atvinnu­maður. „Fer á mót erlendis og tefli alls staðar. Það breyt­ist lítið en auð­vitað er þetta ógeðs­lega gaman að hafa þetta.“

Skák Vignis Vatnars við Carlsen hefur vakið mikla athygli en sjálfur segir hann að það hafi komið honum dálítið á óvart hve stórt þetta varð. „Athyglin er búin að vera eig­in­lega alveg ótrú­leg.“ Hann tekur þó fram að í íslensku sam­fé­lagi sé mik­ill áhugi á skák.  

„Það eru ein­hvern veg­inn allir með chess.com í sím­anum. Allir með gríð­ar­legan áhuga á skák. Það er kannski gott að það komi í fjöl­miðla að það sé íslenskur stór­meist­ari sem geti eitt­hvað af viti. Sem er bara frá­bært. Sem getur lagt númer eitt í heim­inum. Það er hel­víti gott.“