Fréttir

Eldgos hafið norðan við Grindavík

Eldgos er hafið á Sundhnúksgígaröðinni norðan við Grindavík.

Nálægt byggð Gossprungan sem opnaðist í kringum 11 í dag er nær byggð en fyrri sprungan sem opnaðist í morgun. Sú nýja er um fimm hundruð metrum frá ysta húsi í Grindavík.

Ritstjórn

1. apríl 2025 · 09:46

Birtist fyrir 2 árum.

Eldgos er hafið norðan við Grindavík. Þetta kemur fram í tilkynningu frá Veðurstofunni. Bærinn og Bláa lónið voru rýmd í morgun eftir að jörð fór að skelfa og kvikuhlaup hófst.

Átta manns hafa neitað að yfirgefa heimili sín.

„Þyrla Landhelgisgæslunnar fer í loftið innan skamms til þess að staðfesta nákvæma staðsetningu og stærð eldgossins. Nánari upplýsingar verðar aðgengilegar fljótlega. Fluglitakóði hefur verið færður á rautt, þangað til nánari upplýsingar um öskudreifingu berast,“ segir í tilkynningu frá Veðurstofu.

Kvikan spýtist upp úr gossprungunni rétt við varnargarðinn norðan við Grindavíkurbæ. Þetta má glögglega sjá á myndum af gosinu.

Lýsingu lokið Nýjasta færsla kl. 16:03

16:03 1. apríl

Dregur úr virkni

Eins og dregið hefur úr virkni eldgossins, hefur einnig dregið úr virkni þessa beina fréttastraums um jarðhræringarnar.

15:24 1. apríl

Landsbjörg fordæmir byssuatvik við rýmingu

Landsbjörg fordæmir atvik þar sem byssu var miðað yfir höfuð björgunarsveitarmanns í Grindavík í morgun. Í yfirlýsingu frá slysavarnarfélaginu eru atvikinu lýst nánar.

„Í morgun var hópur frá björgunarsveitinni Þorbirni sendur til þess að aðstoða einstakling í bænum við að ganga frá nokkrum lausum endum. Þegar þeirri aðstoð var lokið var viðkomandi bent á að skynsamlegt væri að yfirgefa bæinn. Á þeim tímapunkti situr einstaklingurinn í bíl sínum og björgunarsveitarmaður stendur við gluggann hjá honum þegar viðkomandi dregur upp byssu og beinir henni upp í loftið yfir höfuð björgunarsveitarmanns,“ segir í tilkynningunni.

Þar segir einnig að björgunarsveitarmenn sýni því mikinn skilning að ekki vilji allir yfirgefa bæinn. Það sé alveg skýrt að það sé ekki hlutverk sjálfboðaliða í björgunarsveit að hlutast til um hverjir eigi að fara úr bænum og hverjir mega vera. „Það sem er hins vegar alveg skýrt, að það er algjörlega óásættanlegt að björgunarsveitarfólki sé mætt með því að draga upp skotvopn. Við slíkt getum við ekki og eigum ekki að sætta okkur við,“ segir í tilkynningunni.

Landsbjörg fordæmir atvikið harðlega og undirstrikar að slíkt ofbeldi gagnvart sjálfboðaliðum sé algjörlega óásættanlegt. Samtökin hvetja alla til að sýna björgunarfólki virðingu og skilning — þau séu að vinna í erfiðum og hættulegum aðstæðum af heilindum.

15:16 1. apríl

Virkni minnkað mikið

Veðurstofan segir að samkvæmt vefmyndavélum virðist virkni eldgossins hafa minnkað mikið síðasta klukkutímann.

„Skjálftavirknin er áframhaldandi en er að mestu leyti staðsett við norður og suður hluta kvikugangsins,“ segir í færslu á vef stofnunarinnar.

„Aflögunarmælingar sýna enn áframhaldandi færslu til norðausturs, sem bendir til þess að kvika sé enn að flæða í kvikuganginn.“

15:13 1. apríl

„Ég fékk sms í morgun, síðan fóru lúðrarnir af stað,“ segir Ásrún Helga Kristinsdóttir, forseti bæjarstjórnar Grindavíkurbæjar, sem var í bænum þegar þar var rýmt í morgun eftir að kvikuhlaup hófst á Sundhnúksgígaröðinni. Eftir að viðvörunarlúðrarnir hljómuðu gengu viðbragðsaðilar í hús til að tryggja að allir vissu af rýmingunni.

„Það kom slökkviliðsmaður úr slökkviliði Grindavíkur og mér fannst ótrúlega notalegt að það kom einhver sem ég þekkti. Ég upplifði þetta ekki sem neinn æsing en við fundum sterkt fyrir jarðskjálftunum. Það hreyfði við manni. Það var mjög stutt á milli skjálftanna,“ segir hún.

Lengra viðtal við Ásrúnu má sjá hér:

14:02 1. apríl

Hugur Höllu hjá Grindvíkingum

„Hugur okkar er hjá Grindvíkingum, viðbragðsaðilum og þeim sem huga að öryggi svæðisins, jafnt íbúa, fyrirtækja og ferðamanna,“ skrifar Halla Tómasdóttir, forseti Íslands, í kveðju á Facebook-síðu sinni.

13:54 1. apríl

Dregur úr krafti gossins

Dregið hefur verulega úr krafti gossins við Grindavík sem og hraunflæðinu upp úr gossprungunum. Þetta kemur fram í stöðuuppfærslu frá Eldfjalla- og náttúruvárhóps Suðurlands.

„Áfram skvettist örlítið úr sprungunni næst Grindavík, en virkni þar virðist einnig vera að fjara út,“ segir í færslunni, sem birtist um 20 mínútur yfir eitt í dag. „Áfram er stöðug skjálftavirkni.“

12:51 1. apríl

Nýtt myndband

Hér er nýtt myndband sem Golli, ljósmyndari Heimildarinnar, tók við gosstöðvarnar fyrir skömmu.

Golli

12:48 1. apríl

Heildarlengd gossprungunnar er nú um 1200 metrar, samkvæmt Veðurstofu Íslands. Hún heldur áfram að lengjast til suðurs. Það er í átt að Grindavíkurbæ.

12:43 1. apríl

Skjálftavirkni frá því klukkan 4 í morgun

Á þessu korti frá Veðurstofu Íslands má sjá skjálftavirkni á Sundhnúkagígaröðinni frá því klukkan 4 í morgun.

12:39 1. apríl

Sprunguhreyfingar innan bæjarins

Heitavatnslögn norðarlega í Grindavík er farin í sundur. Þetta segir Veðurstofan að staðfesti að talsverðar sprunguhreyfingar hafi orðið innan bæjarins.

„Áframhaldandi skjálftavirkni mælist á kvikuganginum öllum, en mesta skjálftavirknin er á norðaustur enda gangsins. Kvikugangurinn nær núna rúmum 3 km lengra í norðaustur heldur en sést í fyrri gosum,“ segir í uppfærslu á vef stofnunarinnar. Áframhaldandi færslur eru að eiga sér stað til norðausturs, sem bendir til að kvikan sé enn á hreyfingu um ganginn.

12:19 1. apríl

Svona er eldgosið úr lofti

Golli, ljósmyndari Heimildarinnar, tók meðfylgjandi myndband úr dróna nú rétt í kringum hádegið. Þar sést hraunið streyma upp úr gossprungunum sem opnuðust í morgun beggja vegna varnargarðanna norðan við Grindavík.

Golli

11:55 1. apríl

Einn handtekinn

Úlfar Lúðvíksson lögreglustjóri sagði í aukafréttatíma RÚV nú í hádeginu að hann gæti staðfest að heimamaður hafi verið handtekinn í Grindavík í dag. Hann vildi þó ekki staðfesta að skotvopn hafi verið mundað, en það hefur Helena Rós Sturludóttir, samskiptastjóri Ríkislögreglustjóra, þegar gert.

11:52 1. apríl

„Ég get staðfest að björgunarsveitarfólki var ógnað með skotvopni og sérsveitin var kölluð til,“ segir Helena Rós Sturludóttir, samskiptastjóri Ríkislögreglustjóra, í skriflegu svari til Heimildarinnar.

Hún segir einnig að lögreglan muni ekki veita frekari upplýsingar verða ekki að svo stöddu.

11:43 1. apríl

Myndband úr dróna

Golli

11:42 1. apríl

Úlfar áhyggjulaus yfir fólkinu í Grindavík

„Ég held að eins og þetta lýsi sér þá held ég að fólk komi sér bara í burtu ef hætta nálgast ískyggilega,“ segir Úlfar Lúðvíksson um þá íbúa sem enn dvelja í Grindavík. Hann bætir við að lögreglan hafi ekki miklar áhyggjur af fólkinu í augnablikinu.

11:37 1. apríl

Ógnað með byssu

Björgunarsveitarfólki sem vann að rýmingu bæjarins í morgun var ógnað með byssu. Þetta kemur fram á vef RÚV. Helena Rós Sturludóttir, samskiptastjóri Ríkislöreglustjóra, staðfestir í samtali við RÚV að björgunarsveitarmönnum hafi verið ógnað með skotvopni.

Samkvæmt upplýsingum Heimildarinnar fengu liðsmenn björgunarsveitar sálrænan stuðning frá fulltrúum Rauða krossinn.

Fyrr í dag sagði upplýsingafulltrúi Rauða krossins, Sunna Ósk Logadóttir, að óskað hefði verið eftir aðstoð, en vildi ekki segja hvers eðlis sú aðstoð hafi verið.

„Við getum staðfest að Rauða krossinum barst beiðni um að sinna verkefni tengdu rýmingunni í Grindavík í morgun. Að öðru leyti getum við ekki tjáð okkur um málið,“ sagði í svarinu.

Tvennt dvelur enn í Grindavík og hafa neitað að yfirgefa bæinn.

11:31 1. apríl

Tveir enn í Grindavík

Tveir neita enn að yfirgefa Grindavík. Þetta segir Úlfar Lúðvíksson, lögreglustjórinn á Suðurnesjum. Hann segir að ekki verði gripið neinna þvingana til að fjarlægja fólkið.

Almannavarnir hafa ítrekað óskað eftir rýmingu bæjarins og voru átta manns sem neituðu að yfirgefa Grindavík í fyrstu. Sex þeirra hafa nú yfirgefið bæinn.

Þau tvö sem enn eru í Grindavík dvelja í sama húsinu. Bæði eru þau fullorðin, segir Úlfar. Hann er sá eini sem hefur vald til að taka ákvörðun um að láta fjarlægja fólkið.

Hraun vellur nú upp úr tveimur gossprungum innan varnargarðanna sem umlykja Grindavík í norðri. Um er að ræða einu dekkstu sviðsmyndina sem Almannavarnir hafa undirbúið sig fyrir.

„Það er ekkert til að verja byggðina lengur,“ sagði Hjördís Guðmundsdóttir, samskiptastjóri Almannavarna, við Heimildina fyrr í dag.

11:19 1. apríl

Búast við gasmengun í Reykjavík

Vindátt er með þeim hætti að búist er við því að gasmengun frá gossprungunni blási yfir höfuðborgarsvæðið í dag.

„Spá veðurvaktar er suðvestanátt og blæs gasi til norðausturs í dag (þriðjudag), m.a. yfir höfuðborgarsvæðið. Lægir í kvöld, en þá verður gasmengunin einkum í grennd við gossprunguna,“ segir í uppfærslu á vef Veðurstofunnar.

„Í fyrramálið (miðvikudag) gengur í norðvestan- og síðar vestanátt og gasið best því til suðausturs og síðar til austurs, m.a. yfir Þorlákshöfn og Ölfus.“

Á myndinni hér að neðan má sjá spá veðurvaktar um gasdreifingu klukkan 19.00 í kvöld.

11:15 1. apríl

Ný mynd

Golli, ljósmyndari Heimildarinnar, tók þessa mynd af sprungunni sem opnaðist um klukkan 11. Hún er nær byggðinni en fyrri sprunga en svo virðist sem hún sé ekki jafn kraftmikil og sú sem er norðar.

11:11 1. apríl

500 metrum frá ysta húsi

Nýja sprungan sem opnaðist um klukkan 11 er í um fimm hundruð metra fjarlægð frá ystu húsum í Grindavík. Hún virðist ekki mjög kröftug en hraun flæðir upp úr henni.

11:09 1. apríl

Áttunda gosið

Gosið sem hófst í morgun er áttunda eldgosið í Sundhnúksgígaröðinni. Fyrsta gosið hófst 18. desember árið 2023 og varði það í fjóra daga. Sex gos urðu svo árið 2024 en gosið sem nú stendur yfir er það fyrsta sem á sér stað á þessu ári.

Eldgosin:

18.–21. desember 2023
14.–16. janúar 2024
8.–9. febrúar 2024
16. mars–8. maí 2024
29. maí–22. júní 2024
22. ágúst–5. september 2024
20. nóvember–9. desember 2024
1. apríl– 2025

11:00 1. apríl

„Það er ekkert til að verja byggðina lengur“

Hraun flæðir nú innan varnargarða í Grindavík og ógnar byggð. Íbúum hefur verið eindregið ráðlagt að yfirgefa svæðið, en sumir neita. Ástandið er mjög alvarlegt, segir Hjördís Guðmundsdóttir, samskiptastjóri Almannavarna. Fylgst er náið með hraunflæði úr lofti.

Ástandið er mun hættulegra nú þegar hraun er að koma upp fyrir innan varnargarðana. „Þá er þetta orðið mun hættulegra. Það er ekkert til að verja byggðina lengur. Þetta er mjög slæm sviðsmynd sem við erum að sjá,“ segir hún.

Nánara viðtal við Hjördísi er hér:

10:52 1. apríl

Sunnan við gróðurhús ORF

Af streymi úr vefmyndavél RÚV ofan á Þorbirni, er sprungan sem opnaðist fyrir skömmu neðan við gróðurhús ORF líftækni. Hún er því nær bænum en fyrri sprunga, en þó aðeins um einhverja metra.

10:47 1. apríl

700 metra sprunga

Sprungan er nú talinn vera um 700 metra löng og hefur lengst um 200 metra síðan rúmlega 10 í morgun.

10:46 1. apríl

Ný sprunga opnast nær Grindavík

Ný sprunga hefur opnast sunnan varnargarðanna og er hún staðsett nær Grindavík en sprungan sem opnaðist í morgun. Þetta kemur fram á vef RÚV en nýju sprunguna má sjá á vefmyndavélum.

10:44 1. apríl

Staðsetning sprungunnar

Gossprungan er staðsett norðan við bæinn og er um 700 metra löng, samkvæmt mati Veðurstofu Íslands fyrr í morgun. Hraun úr sprungunni, þar sem hún er opin sunnan við varnargarðana, vellur nú í átt að gróðurhúsi ORF líftækni. Engin starfsemi er í húsinu, sem var tæmt og úrskurðað ónýtt í fyrri jarðhræringum á svæðinu.

10:38 1. apríl

Séð úr þyrlu Gæslunnar

Almannavarnardeild Ríkislögreglustjóra hefur birt myndband sem tekið var úr þyrlu Landhelgisgæslunnar.

10:36 1. apríl

Golli

10:23 1. apríl

Þegar sprungan opnaðist sáust hrauntungurnar teygja sig upp í loftið rétt við varnargarðana.

10:19 1. apríl

Enn fólk í Grindavík

Úlfar Lúðvíksson, lögreglustjóri á Suðurnesjum, segir örfáa íbúa enn í Grindavík þrátt fyrir að eldgos sé hafið við bæinn.

„Þetta eru íbúar sem hafa kosið að dvelja áfram inni í bænum. Mér sýnist þeir ekki vera í bráðri hættu eins og staðan er í augnablikinu. Við erum búin að tala við fólk ítrekað og fara yfir þessa hluti en við höfum ekki farið út í þvingaðan brottflutning - við höfum ekki borið fólk út úr húsum. Þetta er fullorðið fólk og þekkir vel til flóttaleiða og ástandsins að öðru leyti,“ segir hann.

Þegar Heimildin náði tali af Úlfari var hann á leið í aðgerðastöðina í Reykjanesbæ þar sem vel er fylgst með stöðunni. Gosið kemur upp bæði utan og innan við varnargarðana sem ætlað var að verja Grindavík frá hraunflæði. „Varnargarðurinn kemur ekki að notum eins og hann var hugsaður þegar jörðin opnast fyrir innan varnargarð,“ segir hann.

10:18 1. apríl

Röngu megin varnargarðanna

Hraun flæðir nú sunnan við varnargarðana ofan við Grindavík. Golli, ljósmyndari Heimildarinnar, tók þessa mynd af eldgosinu rétt eftir að sprungan opnaðist þeim megin garðanna. Ekki er útilokað að sprungan teygist lengra til suðurs, í átt að bænum.

10:12 1. apríl

Lýsa yfir neyðarstigi

„Ríkislögreglustjóri hefur í samráði við lögreglustjórann á Suðurnesjum ákveðið að fara á neyðarstig vegna eldgoss við Sundhnúkagígaröð,“ segir í tilkynningu frá Almannavörnum.

„Eldgos hófst fyrir stuttu rétt fyrir ofan varnargarðinn við Grindavík. Samhæfingarstöð Almannavarna var virkjuð á áttunda tímanum í morgun þegar ljóst var að kvikuhlaup var hafið. Þyrla Landhelgisgæslunnar er farin í loftið.“

10:08 1. apríl

Komið í gegnum garðinn

Gossprungan hefur opnast sunnan við varnargarðinn og er Grindavík því ekki lengur í vari af garðinum. Þetta staðfestir Úlfar Lúðvíksson, lögreglustjóri á Suðurnesjum, í samtali við Heimildina. Það má líka sjá á vefmyndavélum sem beinast að gossprungunni.

10:01 1. apríl

Skjálftahrinan sem hófst í morgun var staðsett á milli Sýlingarfells og Stóra-Skógfells. Þeir sem synntu rýmingu inni í Grindavík fundu fyrir skjálftunum undir fótum sér.

09:59 1. apríl

Nú stendur yfir fundur á Veðurstofunni þar sem farið er yfir þær upplýsingar og þau gögn sem liggja fyrir um stöðuna. Búið er að virkja samhæfingarmiðstöð Almannavarna. Það var gert strax og kvikuhlaup hófst ímorgun.

09:56 1. apríl

Eldgosið hófst um 20 mínútur fyrir 10. Tilkynning barst frá Veðurstofunni um gosið klukkan 9.44.

Kjósa

Hvernig finnst þér þessi grein? Skráðu þig inn til að kjósa.

Veistu meira? Láttu okkur vita

Deila

Höfundur

Ritstjórn

Athugasemdir

Skráðu þig inn til að skrifa athugasemd eða kjósa.

Allar athugasemdir eru ábyrgð á þeirra sem þær skrifa. Heimildin áskilur sér rétt til að fjarlægja ærumeiðandi og óviðeigandi athugasemdir. Hægt er að láta vita af athugasemdum með því að smella á Tilkynna.