„Við búum í einræðisríki,“ sagði Kuzey, verslunareigandi í Istanbúl, eftir að lögreglan handtók vinsælan borgarstjóra stjórnarandstöðunnar, Ekrem Imamoglu, vegna ásakana um spillingu.

Handtaka Imamoglu snemma morguns vegna spillingarákæru var eingöngu pólitísk, sagði Kuzey þegar hann opnaði verslun sína nálægt Taksim-torgi í borginni.

Aðgerðin kom fáeinum dögum áður en Imamoglu, helsti pólitíski andstæðingur Receps Tayyips Erdogans, forseta Tyrklands, átti að vera formlega tilnefndur sem frambjóðandi stjórnarandstöðunnar fyrir kosningarnar 2028.

„Í hvert skipti sem þessi náungi og óhreina liðið hans sjá einhvern sterkan, fara þau í panikk og gera eitthvað ólöglegt við hann,“ sagði þessi fertugi maður, klæddur í gallabuxur og svartan bol, og vísaði til Erdogans og AKP flokksins sem hefur verið við völd síðan 2003.

„En við Tyrkir erum sterkt fólk, við erum vön að berjast gegn svona hlutum,“ sagði hann á meðan fjöldi lögreglumanna stefndi að Taksim-torgi sem var afgirt með málmgirðingum.

Fjórir óeirðabílar voru á staðnum, allir vopnaðir vatnsbyssum, til að koma í veg fyrir mótmæli á þessu stóra torgi sem var miðpunktur gríðarlegra mótmæla gegn Erdogan árið 2013, þegar hann var forsætisráðherra.

Margir voru tregir til að tjá sig um atburðarásina sem þróaðist hratt, og þeir sem gerðu það neituðu að gefa upp meira en skírnarnafn sitt.

„Þetta er mjög slæmt og ég veit ekki hvað gerist næst. Maður veit aldrei hvað þau gera,“ sagði vegfarandi að nafni Mustafa. „Ég er reiður en hvað getum við gert?“