Diljá Mist Einarsdóttir sækist eftir því að verða næsti varaformaður Sjálfstæðisflokksins. Nýr varaformaður verður kjörinn á landsfundi flokksins sem fram fer um helgina. Jens Garðar Helgason hefur einnig tilkynnt að hann sækist eftir embættinu. 

Diljá Mist tilkynnti í gær að hún myndi í kvöld, miðvikudag, halda fund með stuðningsfólki sínu í Grósku. Hún hefur um hríð verið orðuð við framboð til varaformanns Sjálfstæðisflokksins og þótti sú tilkynning gefa því byr undir báða vængi.

Á samfélagsmiðlum í dag tilkynnir hún um framboð sitt. 

„Heim­ur­inn er að breyt­ast hratt fyr­ir aug­um okk­ar og í því fel­ast bæði áskor­an­ir og mik­il tæki­færi. Grunn­gildi Sjálf­stæðis­flokks­ins, frelsi, sam­kennd og sköp­un­ar­kraft­ur hafa gert Ísland að því landi sem við elsk­um. Sjá­lfstæðis­flokk­ur­inn stend­ur á kross­göt­um. Við þurf­um að sjá til þess að þessi gildi haldi áfram – að skapa tæki­færi og sam­fé­lag þar sem all­ir geta blómstrað,“ segir Diljá í myndskeiði sem hún birtir bæði á Instagram og Facebook.

Núverandi varaformaður, Þórdís Kolbrún Reykfjörð Gylfadóttir, mun ekki gefa kost á sér áfram. Á landsfundinum verður einnig kjörinn nýr formaður Sjálfstæðisflokksins en þær Áslaug Arna Sigurbjörnsdóttir og Guðrún Hafsteinsdóttir eru báðar í framboði.

Diljá Mist heffur sinnt ýmsum verkefnum á vettvangi Sjálfstæðisflokksins frá 17 ára aldri. Hún hefur gegnt stöðu ritara og varaformanns Heimdallar, annars varaformanns Sambands ungra sjálfstæðismanna, setið í stjórn hverfafélags Sjálfstæðisflokksins í Grafarvogi, setið í stjórn Varðar, fulltrúaráðs Sjálfstæðisflokksins og átti sæti í endurskoðunarnefnd Reykjavíkurborgar. Hún situr sem þingmaður fyrir Sjálfstæðisflokkinn í Reykjavíkurkjördæmi norður. Diljá hefur sem þingmaður tekið sæti í efnahags- og viðskiptanefnd og utanríkismálanefnd, auk þess að gegna embætti fjórða varaforseta Alþingis. Hún situr nú í Íslandsdeild þingmannanefnda EFTA og EES, og þingmannanefnd Íslands og ESB.