Banda­ríkja­for­seti, Donald Trump, kallar for­seta Úkraínu, Volody­myr Zelensky, „ein­ræð­is­herra“.

Banda­ríkin hafa veitt Úkraínu fjár­stuðn­ing og vopn frá upp­hafi allserj­ar­inn­rásar Rússa fyrir þremur árum, en Trump hefur, frá því hann tók við emb­ætti, breytt stefn­unni skyndi­lega og hafið beinar við­ræður við full­trúa Rúss­lands. Á sama tíma hrósar utan­rík­is­ráð­herra Rúss­lands, Sergei Lavrov, Trump í hástert og kallar Zelensky „aumk­un­ar­verðan“. Nú bætir Trump um betur og herðir á for­dæm­ing­unni á for­seta Úkraínu, sem þola hefur þurft stöðugar árásir í þrjú ár.

„Ein­ræð­is­herra án kosn­inga, Zelensky ætti að hafa hraðar hendur, ann­ars á hann ekki eftir að eiga neitt land eftir,“ skrif­aði Trump á Truth Social vett­vang sínum um Úkra­ínu­for­seta. Fimm ára kjör­tíma­bil Zelenskys rann út í fyrra en ekki hafa verið haldnar kosn­ingar vegna inn­rásar Rússa, þar sem úkra­ínsk lög gera ekki ráð fyrir kosn­ingum í stríðs­á­standi. 

Á þriðju­dag hélt Trump blaða­manna­fund þar sem hann gagn­rýndi Zelensky, end­ur­tók nokkrar af frá­sögnum Kremlar um átökin og kall­aði eftir því að stríð­inu lyki. Zelensky sak­aði Trump um að gleypa við rúss­neskum „rang­færslum“, meðal ann­ars full­yrð­ingum Trump um að Kænu­garður bæri ábyrgð á því að hafa „hafið“ stríðið, og að hann drægi lög­mæti Zelensky í efa. 

„Hann neitar að halda kosn­ingar, nýtur lít­illar fylgis í úkra­ínskum skoð­ana­könn­unum og eina sem hann var góður í var að spila á (Joe) Biden eins og fiðlu,“ skrif­aði Trump um Zelensky á Truth Social. 

„Í milli­tíð­inni erum við að semja um að binda enda á stríðið við Rússland, eitt­hvað sem allir við­ur­kenna að aðeins 'TRUMP' og stjórn Trumps geti gert,“ bætti Trump við í færsl­unni. Leið hans í samn­inga­við­ræðum við Rússa hefur verið að fara fram hjá Evr­ópu­þjóðum og Úkraínu, gefa eftir í upp­hafi kröfur Úkraínu um inn­göngu í Nató og end­ur­heimt her­tek­ins land­svæðis og nú að fall­ast á sögu­þráð Rússa um að stríðið hafi verið Úkraínu og Nató að kenna.

Zelensky var kjör­inn árið 2019 til fimm ára en hefur haldið völdum sam­kvæmt her­lögum sem voru sett eftir inn­rás Rúss­lands. Vin­sældir hans hafa dalað eitt­hvað, en sam­kvæmt Kyiv International Institute of Sociology (KIIS) hefur hlut­fall Úkra­ínu­manna sem treysta honum aldrei fallið undir 50 pró­sent síðan átökin hófust. Trump vitn­aði til þess í gær að Zelensky hafi aðeins 4% stuðn­ing í Úkraínu. Engin slík skoð­ana­könnun hefur litið dags­ins ljós og er heim­ildin fyrir henni talin vera Rússar.

Þá vakti athygli í síð­ustu viku að Trump fór fram á að Úkraína veitti Banda­ríkj­unum aðgang að sjald­gæfum málmum á landi þeirra, en Zelensky neit­aði að gang­ast við kröf­unum.