Eftir glæsilega byrjun á nauðsynlegri rafvæðingu bílaflotans kom fjármálaráðherra og gekk erinda þeirra sem vilja ekki að krónan styrkist.
Niðurfelling gjalda á rafmagnsbíla og að geta keyrt bíla á rafmagni var gífurleg kjarabót fyrir kaupendur/eigendur bílanna, sérstaklega launafólk og eldri borgara sem eiga ekki að þurfa að velta fyrir sér kostnaði við að komast í vinnu, sundlaugina, ræktina, til læknis, í leikhús, bíó, hitta vini á kaffihúsi eða heimsækja fjölskyldu, fara austur eða norður; þ.e. njóta alvöru lífsgæða sem landið býður uppá.
Við urðum vör við mikinn kipp í sölu rafmagnsbíla sem gaf von um góðan árangur almennra borgara í loftslagsmálum og leit út fyrir að við yrðum fljót að skipta yfir. Bílarnir keyra á ódýru heimarafmagni og auka frelsi og þægindi bæði eigenda og leigjenda (túrista). Að hætta léttingu gjalda af rafmagnsbílum og setja síðan kílómetragjald á bílana, þegar þeir ekki bara spara verðmætan gjaldeyrir heldur minnka kolvetnissporið og spara þjóðinni kaup á kolvetniskvóta, sem gerir meira en að borga upp kostnað þessara bíla af sliti á vegum, var bara algerlega vanhugsuð aðgerð og hægði að sjálfsögðu strax á sölu (sem var kannski markmiðið vegna mikils sparnaðar á innflutningi á olíuvörum sem myndi setja þrýsting á styrkingu krónunnar sem er tabú á Íslandi af öllum þjóðum).
Sama vitleysan á við þegar kemur að því að breyta gjöldum af bensín- og dísilbílum í kílómetragjald. Með því að breyta gjaldtöku í kílómetragjald er jákvæður sparnaður lagður til hliðar og við munum sjá bensín- og olíuháka aftur keyra á ofsahraða, án nokkurrar tillits til sparnaðar á ódýru bensíni og olíu, til jafns við rafmagnsbílana, sem hafa miklu meiri hvata til að spara orku og auka drægni.
Ég skora á fólk að skoða þetta vel og skilja hvílík lífsgæði eru fólgin í því að rafvæða einkabílinn (og alla bíla) og minnka mengun hratt og vel, og með því hafa almenning með í baráttunni gegn loftslagsvánni og jákvæðum sparnaði á verðmætum gjaldeyrir. Gerum okkur grein fyrir að „sparnaður á gjaldeyri” er verðmætara en að þéna gjaldeyri. Og gleymum ekki kolvetninssparnaðinum sem skiptir milljörðum á næstu árum.
Athugasemdir