Borgarbyggð hefur látið kortleggja sveitarfélagið út frá ákveðnum forsendum um hvar skuli ekki reisa vindorkuver í framtíðinni. Vindorkuver skulu til dæmis ekki rísa á óbyggðum víðernum, jöklum, í landhalla yfir 30 prósent, í innan við kílómetra frá byggð og í nágrenni friðlýstra menningarminja. Þá eru svæði í meira 300 metra hæð yfir sjávarmáli sögð óhentug fyrir slík orkumannvirki.
Kortlagningin er hluti af vinnslutillögu aðalskipulags Borgarbyggðar til næstu tólf ára. Í greinargerð tillögunnar segir að stefnumótun um nýtingu vindorku sé mótuð á grunni kortlagningar á mögulegum svæðum fyrir nýtingu hennar út frá fjarlægð frá byggð, flutningskerfi og öðrum takmörkunum vegna landnotkunar. „Sveitarfélagið mun taka ákvarðanir um vindlundi þegar þeir hafa verið settir í nýtingarflokk rammaáætlunar.“
Í kortlagningunni eru takmarkanir þau svæði sem eru sögð óhentug fyrir virkjun vindorku og útiloka slíka landnotkun. Takmarkanir voru valdar í samráði við vinnuhóp Borgarbyggðar um endurskoðun aðalskipulagsins.
Þær takmarkanir sem miðað var við í kortlagningu fyrir Borgarbyggð eru meðal annars friðlýst svæði, valin hverfisvernduð svæði, óbyggð víðerni, jöklar, brunn- og grannsvæði vatnsverndar, svæði með landhalla yfir 30 prósent, nærsvæði umhverfis byggð (1 km), vegi (0,1 km) og flutningsmannvirki raforkukerfisins (0,1 km), friðlýstar menningarminjar og 100 m friðhelgað svæði utan þeirra og hindranafletir flugvalla.
„Sjónræn áhrif vindorkugarða eru talin ein af helstu umhverfis- og samfélagsáhrifum þeirra en mat á sjónrænu áhrifunum veltur á ýmsum breytum svo sem staðsetningu vindorkugarðsins og hæð vindmyllanna. Áhrif sýnileika þarf að skoða fyrir hvern kost fyrir sig og erfitt að meta þau heildrænt fyrir stórt landsvæði eins og hér er til skoðunar.“
Samþykkt var á síðasta fundi sveitarstjórnar Borgarbyggðar að auglýsa vinnslutillögu aðalskipulagsins. Á kynningartíma verða íbúafundir haldnir.
Athugasemdir