Kolbeinn Sigþórsson, fyrrverandi landsliðsmaður og atvinnumaður í knattspyrnu, er ákærður fyrir að hafa dregið niður nærbuxurnar á barni og strokið kynfæri þess „fram og til baka mörgum sinnum.“ Hið meinta brot átti sér stað sunnudaginn 26. júlí 2022, eða fyrir tæpum tveimur árum síðan.
Kolbeinn er ákærður fyrir nauðgun og kynferðisbrot gegn barni fyrir að hafa með ólögmætri nauðung haft það sem kallað er „önnur kynferðismök“ við stúlkuna. Hann hafi nýtt sér yfirburði sína gagnvart stúlkunni við brotið en aldur hennar hefur verið afmáður úr ákæru sem Heimildin hefur undir höndum.
Í ákærunni kemur fram að Kolbeinn sé grunaður um brot gegn 194. og 202. grein almennra hegningarlaga. Fyrri greinin segir að hver sem hefur „samræði eða önnur kynferðismök við mann án samþykkis hans gerist sekur um nauðgun og skal sæta fangelsi ekki skemur en 1 ár og allt að 16 árum.“ Sú síðari segir að hver sem hefur „samræði eða önnur kynferðismök við barn, yngra en [15 ára], skal sæta fangelsi [ekki skemur en 1 ár og allt að 16 árum].“
Móðir þolandans krefst þriggja milljóna króna miskabóta fyrir hönd dóttur sinnar. Ákæran var gefin út 11. janúar síðastliðinn.
Athugasemdir