Óvissustig er á Vestfjörðum vegna snjóflóðahættu og eru flestir vegir ófærir. Appelsínugul viðvörun er í gildi til klukkan sex í dag. Á vef Veðurstofu Íslands kemur fram að á Vestfjörðum sé „norðaustan stormur, 18-25 metrar á sekúndu og talsverð snjókoma og skafrenningur með mjög lélegu skyggni.“ Eftir sex í kvöld er gul viðvörun þar sem „búast má við slæmu skyggni og versnandi færð.“ 

Heimildin fjallaði fyrr á árinu um umferðina um Súðavíkurhlíðina. Vegurinn er lokaður vegna snjóflóðahættu í dag, eins og oft er raunin. Á ellefu ára tímabili, frá 2012 til og með 2022 var þjóðveginum milli Súðavíkur og Ísafjarðar lokað í 151 dag, eða að meðaltali tvær vikur á ári. 

Lokaðir vegir

Þó að lokað sé fyrir umferð um Súðavíkurhlíð hefur það ekki í för með sér að Súðvíkingar fari ekki um veginn til að sækja sér þjónustu til Ísafjarðar s.s. verslun, heilbrigðisþjónustu og fleira.

Tíðar lokanir hafa þó mikil áhrif á þá sem þurfa að keyra á milli plássanna vegna vinnu. En þær raska líka öllum flutngingum til og frá Ísafjarðarbæ og Bolungarvík. Mikið magn af fiski er fluttur þar um, ekki síst lax.

Kostnaðurinn við að halda veginum opnum, framkvæmdir til að reyna að verja veginn, malbika og laga nam hálfum milljarði króna á þessu tímabili. Einungis lítill hluti vegarins hefur þó verið varinn og þær varnir sem komnar eru koma tæpast í veg fyrir að stærri flóð nái vegi eða fari út í sjó.

Svokölluð snjóflóðagil á tæplega tveggja og hálfs kílómetra kafla í Súðavíkurhlíð eru 22 talsins. Eitt á hverja hundrað metra. Það eru gil sem safna í sig miklu magni af snjó sem hlaupið getur fram í snjóflóði. En slíkt gerist oft. Flóða hafa fallið úr flestum þessara gilja jafnvel á sama sólarhringnum.