Stærsti jarðskjálfti sem mælst hefur frá upphafi mælinga í Grímsvötnum mældist í morgun klukkan 6:53. Jarðskjálftinn var 4,3 af stærð. Hlaupórói hefur hægt vaxandi mælst á Grímsfjalli og síðan í gær hefur vatnsmagn í Gígjukvísl farið vaxandi. „Jökulhlaup er því hafið úr Grímsvötnum,“ segir í tilkynningu Veðurstofu Íslands. Þá segir einnig að jarðskjálftinn í morgun hafi líklega verið vegna þrýstingsléttis í kjölfar upphafs jökulshlaupsins.
Hlaup í Grímsvötnum var síðast í október 2022 og þar áður í kringum mánaðamót nóvember og desember árs 2021. „Samkvæmt mælingum Jarðvísindastofnunar er vatnsmagn í Grímsvötnum nú talið vera um 0,29 km3 sem er helmingi (50%) meira en fyrir hlaupið 2022 en tæpur þriðjungur vatnsmagns fyrir hlaup í lok árs 2021.“
Hlaupið ætti ekki að hafa áhrif á nein mannvirki
Samband við GPS tæki Jarðvísindastofnunar næst ekki á íshellunni í Grímsvötnum. „Torveldar það mat á því hversu ört vatnið rennur úr Vötnunum og niður farveginn undir Skeiðarárjökli. Ef miðað er við að atburðarás í þessu hlaupi verði svipuð og í síðustu tveimur hlaupum má gera ráð fyrir að hámarksrennsli úr Grímsvötnum verði um eða fljótlega eftir komandi helgi. Hámarksrennsli í Gígjukvísl við Þjóðveg 1 næst svo um 1-2 sólarhringum seinna.“
Í tilkynningunni kemur fram að hlaupið ætti ekki að hafa nein áhrif á mannvirki líkt og vegi og brýr.
„Talið er að skyndilegur þrýstiléttir vegna lækkandi vatnsborðs hleypi af stað gosum,“ segir í tilkynningunni en síðast varð eldgos í Grímsvötnum árið 2011. Það eldgos var ekki í tengslum við jökulhlaup.
Vegna jökulhlaupsins hefur eldstöðin verið færð á gulan lit þar sem eldstöðin sýnir merki um virkni umfram venjulegt ástand.
Athugasemdir