Sjálfstæðisflokkurinn mælist með 18,1 prósent fylgi í nýjast Þjóðarpúlsi Gallup. Það er langminnsta fylgi sem flokkurinn hefur nokkru sinni mælst með í könnunum fyrirtækisins. Raunar er þetta einungis í þriðja sinn frá því að Gallup hóf mælingar sem fylgi Sjálfstæðisflokksins mælist undir 20 prósentustigum. Hin skiptin voru í apríl 2022 og nóvember 2023 þegar fylgi mældist 19,8 prósent. 

Hinir tveir stjórnarflokkarnir bæta við sig svipuðu og Sjálfstæðisflokkurinn tapar milli mánaða. Fylgi Vinstri grænna mælist nú sex prósent eftir að hafa náð metlægð í nóvember þegar það mældist einungis 5,1 prósent. Framsóknarflokkurinn fer úr 8,6 í 9,4 prósent milli mánaða.

Í frétt RÚV um könnunina kemur fram að Sjálfstæðisflokkurinn myndi fá tólf þingmenn að óbreyttu, sem er fimm færri en hann hefur í dag. Framsókn myndi fá sjö og Vinstri græn fjóra. Samanlagt næðu stjórnarflokkarnir, sem í dag eru með 38 þingmenn, einungis 21. Miðað við það væri ríkisstjórnin kolfallin ef kosið yrði í dag.

Samfylkingin langstærsti flokkurinn

Samfylkingin er áfram sem áður sá flokkur sem mælist langstærstur samkvæmt könnunum. Alls segjast 28,4 prósent aðspurðra styðja flokk Kristrúnar Frostadóttur, sem er svipað fylgi og flokkurinn hefur mælst með undanfarna mánuði. Samfylkingin hefur nú mælst stærsti flokkur landsins sleitulaust frá byrjun árs 2023. Það fylgi sem flokkurinn mælist með myndi tryggja Samfylkingunni 19 þingmenn, sem er 13 fleiri en flokkurinn hefur í dag. Samkvæmt útreikningum Gallup fyrir RÚV yrði flokkurinn stærstur í fimm af sex kjördæmum. Eina kjördæmið sem hann næði ekki slíkri stöðu er í Norðvesturkjördæmi þar sem Framsókn yrði stærstur að óbreyttu.

Miðflokkurinn, sem mælist með 9,7 prósent fylgi, myndi fá sex þingmenn ef kosið yrði í dag og þrefalda þingflokk sinn. Þótt draga megi þá ályktun að þorri þess fylgis sem Miðflokkurinn hafi bætt við sig það sem af er kjörtímabili – alls 4,2 prósentustig – komi frá Sjálfstæðisflokknum þá er fylgistap hins fyrrnefnda – 6,3 prósentustig – umtalsvert meira en fylgisaukning þess síðarnefnda. Miðflokkurinn mælist nú þriðji stærsti flokkur landsins samkvæmt Gallup.

Píratar og Viðreisn standa í stað

Píratar, sem mælast með 9,1 prósent fylgi, og Viðreisn, sem mælist með 8,8 prósent, eru á nánast nákvæmlega sömu slóðum og flokkarnir voru eftir síðustu kosningar. Píratar myndu áfram ná í sex þingmenn og Viðreisn í fimm, sem er sami þingmannafjöldi og flokkarnir tveir eru með í dag. 

Eini stjórnarandstöðuflokkurinn sem mælist með minna fylgi en hann fékk haustið 2021 er Flokkur fólksins. Þá fékk hann 8,8 prósent atkvæða en mælist nú með 6,8 prósent. Það myndi þýða að Flokkur Ingu Sæland myndi tapa heilum tveimur þingmönnum vegna dreifingar fylgisins og fá einungis fjóra þingmenn.

Sósíalistaflokkur Íslands rekur lestina með 3,6 prósent fylgi en hann náði ekki inn á þing í kosningunum fyrir rúmum tveimur árum, og myndi heldur ekki ná inn miðað við stöðu mála í dag.