„Ég heiti Fannar Pálmason og við erum í Melabúðinni í kjötborðinu. Einmitt núna er ég að pakka inn kjúklingasósu sem við gerum sjálf. Ég geri hana ekki, er bara að verðmerkja hana og síðan fer hún í hitaskápinn með kjúklingnum, sem við gerum sjálf líka. 

Skemmtilegast við vinnuna er að verka kjöt. Það er skemmtilegast að verka lambalæri, því það tekur smá tíma og ég þarf að vanda mig. Það er eins og hugleiðsla. Það getur tekið allt frá fimm mínútum upp í tuttugu mínútur ef ég er ekkert að flýta mér, en því næ ég bara heima. Ég elda mikið lambakjöt heima. Leyniuppskrift? Ég ætla ekki að segja þér hana. 

Ég er uppalinn í Danmörku, annars er ég úr Grafarholti. Ég kom til Íslands þegar ég var sjö ára. Mitt helsta áhugamál eru tölvuleikir. Akkúrat núna er ég að spila No Man's sky og Fortnite.

Líf mitt breyttist örugglega þegar strákurinn minn fæddist, það eru fjögur og hálft ár síðan. Ábyrgðin og svona. Við erum góðir vinir, bestu vinir. 

Ég er búinn að vinna hérna frá 26. september og finnst mjög gaman. Allir fastakúnnarnir sem koma hingað að spjalla muna eftir manni, gamla fólkið og svona, mér finnst það svo skemmtilegt. Vanalega er ég sjómaður. Ég hef verið á sjó í tvö ár en fann að ég þyrfti að vinna aðeins í landi þangað til að ég nenni aftur út á sjó. Ég sótti sérstaklega um á kjötborðinu af því að mig langaði að vinna við þetta, vanur að verka fisk og svona. Er erfitt að vinna á sjó? Já og nei, ég myndi segja að það erfiðasta væri að vera svona lengi í burtu frá landi. En ég mun fara aftur, mér líður vel úti á sjó, þar á ég heima. 

Hvað er ég gamall? 22 ára.“