Það er sameiginlegt mat vísindamanna sem sóttu stöðufund Veðurstofunnar, almannavarna og sérfræðinga Háskóla Íslands í morgun að út frá nýjustu gögnum sé svigrúm til tímabundinna aðgerða á vegum almannavarna til að sækja nauðsynjar fyrir íbúa og sinna brýnum erindum í Grindavík og nágrenni.

Þetta kemur fram í tilkynningu frá Veðurstofunni. Enn er ekki búið að taka ákvörðun um hvort farið verði í aðgerðirnar en það vald liggur hjá lögreglustjóranum á Suðurnesjum. 

Á meðan aðgerðum almannavarna stæði í Grindavík yrði vakt svæðisins aukin og fylgst náið með merkjum um hvort að kvika komi upp. „Það var mat vísindamanna eða ráðlegt væri að hefja þessar aðgerðir strax þar sem óvissa um framvindu atburðarins vex eftir því sem líður á daginn.“

Frá því í gærmorgun hefur skjálftavirknin við kvikuganginn haldist nokkuð stöðug. Frá miðnætti hafa um 1000 skjálftar mælst og hafa þeir allir verið undir 3,0 að stærð. Mesta skjálftavirknin hefur verið frá miðju gangsins norðan við og suður undir Grindavík. Flestir skjálftanna eru á 3-5 kílómetra dýpi við neðri hluta kvikugangsins. Gangurinn er talinn vera um 15 kílómetra langur.

GPS mælingar sem ná yfir síðasta sólarhring sýna að hægt hefur á aflögun tengt kvikuganginum sem myndaðist á föstudag. „Það bendir til þess að kvika sé að færa sig nær yfirborði,“ segir í tilkynningu Veðurstofunnar. Engin líkön hafa þó verið keyrð til að ákvarða dýpi hennar að svo stöddu.