„Farinn í eldgosafrí,“ segir í glugganum á heimili í Grindavík. Íbúar voru í óðaönn að koma sér, með yfirveguðum hætti, úr bænum, ásamt því að aðstoða hver annan. Á sama tíma dúaði jörðin undir íbúunum, þar sem jarðskjálftarhrinan hafði náð beint undir byggðina vegna gríðarlegs hniks kviku undir yfirborðinu.

Fólk bar sig almennt vel, þreytt á skjálftum, en vonaði það besta. Skipulögð vinnubrögð björgunarsveitanna hjálpuðu til og umferðin gekk greiðlega fyrir sig.

Engu að síður var óttast að eldgos gæti hreinlega komið upp í miðjum bænum.

Fleiri íbúar gripu til gamanseminnar á erfiðum degi. „Það er ótrúlegt að fylgjast með gangi mála. Ég vissi að ég hefði ekki átt að ryksuga í gær,“ sagði kona ein á Facebook, sem fór frá heimili sínu í Grindavík fyrr í dag.