Bjarni Benediktsson, formaður Sjálfstæðisflokks, hefur sagt af sér embætti fjármála- og efnahagsráðherra. Það gerir hann eftir að umboðsmaður Alþingis komst að þeirri niðurstöðu að hann hafi verið vanhæfur til að að selja félagi í eigu föður síns, Benedikts Sveinssonar, hlut í Íslandsbanka í lokuðu útboði sem fram fór í mars í fyrra.

Á blaðamannafundi sem hann hélt fyrir skemmstu sagði Bjarni að Það bæri „að virða álitið og álítið er að mér hafi brostið hæfi í málinu. þessa niðurstöðu hyggst ég virða.“

Bjarni segir ekki gott að segja hvað þetta þýðir fyrir ríkisstjórnarsamstarfið. Ekki liggur fyrir hvort hann taki við annarri ráðherrastöðu enn sem komið er né hvort hann ætli að sitja áfram sem þingmaður. „Ég er knúinn til að láta af störfum hér.“ 

Hann segist ósammála þeim forsendum sem lögð eru til grundvallar áliti Umboðsmanns en hann vill samt hlíta þeirri niðurstöðu sem fyrir liggur. Bjarni segir að betra hafi verið ef faðir hans hefði sleppt því að kaupa hlut í Íslandsbanka.

Í áliti umboðsmanns Alþingis, sem var birt í morgun, sagði meðal annars að í ljósi þess að einkahlutafélag föður fjármála- og efnahagsráðherra var á meðal kaupenda að 22,5 prósent hlut ríkisins í Íslandsbanka sem seldur var í mars 2022 „brast hann hæfi þegar hann samþykkti tillögu Bankasýslunnar um söluna.“ 

Þar segir ennfremur að það breyti engu um niðurstöðuna að Bjarni staðhæfi að hann hafi ekki vitað að meðal tilboða sem hann væri að samþykkja fyrir hönd ríkisins væri eitt frá föður hans. 

Félagið Hafsilfur ehf, sem er fjárfestingafélag Benedikts, keypti 55 milljóna króna hlut í Íslandsbanka í útboði sem fram fór 22. mars á síðasta ári. Hann var sá 118. stærsti meðal kaupenda í lotunni, sem fram fór í lokuðu útboði.