„Ég átti aldrei von á því að verða kaupmaður“

„Ég heiti Jóna Jóhanna Stein­þórs­dóttir og er fædd og upp­alin í sveit. Ég var bóndi í mörg ár í Norð­firði. Svo var ég að keyra strætó í sum­ar­afleys­ingum og keyra hjá ferða­þjón­ustu Kópavogs. Síðustu þrjú árin vann ég á hjúkr­un­ar­heim­il­inu Mörk. Ég er ófeimin við að prófa eitt­hvað nýtt enda hef ég engu að tapa og rek nú litla jóla­búð ásamt vin­konu minni, Maríu Björk Við­ars­dóttur.

Við tókum við rekstr­inum 1. júlí og þetta leggst bara vel í mig. Ég átti aldrei von á að verða kaup­maður en þetta er bara mjög gaman. Við erum báðar mikil jóla­börn og sáum búð­ina aug­lýsta til sölu en gerðum ekk­ert í þessu í ein­hvern tíma. Svo bara allt í einu fór allt af stað og hér er ég. Það er mjög mikið að gera. Ég hefði aldrei trúað því að það væri svona mikið að gera í jóla­búð að sum­ar­lagi. Við erum aðeins að gera smá breyt­ingar, lag­færa, und­ir­búa jólin og panta inn til þess að eiga nóg þegar jóla­törnin byrjar aftur í nóv­em­ber. Þetta er allt öðru­vísi en allt sem ég hef gert áður. Ég ætl­aði aldrei að flytja til Reykja­víkur en kom hingað 1999 og á hér þrjú börn og tvö barna­börn. Þetta er bara fjör.

Það besta við haustið er að þá koma kerta­ljós og ég kemst í berjamó, það er nátt­úr­lega það besta. Ég tala nú ekki um ef maður kemst að smala og í réttir, það er topp­ur­inn. Á eftir legg ég af stað upp í sveit og tek smá helg­ar­frí þar. 

Á síð­ustu árum hef ég lært að góð heilsa er ekki sjálf­gefin. Ég er búin að vera að vinna með svo mikið af veiku fólki og hef áttað mig á því að góð heilsa er það dýr­mætasta sem þú hefur. Til þess að við­halda minni heilsu tek ég rétt vítamín, hreyfi mig, fer í sund, göngut­úra og sef vel. En svo núna er ég kannski að vinna alltof mikið en við erum nýteknar við og það er tíma­bundið álag. En ég er að fara í frí í sveit­ina að hlaða batt­er­íin og það verður bara algjör kyrrð og ró.“