Tvö snjóflóð féllu á Norðfirði í morgun; annað á hús í byggð við Starmýri í Neskaupstað og hitt vestan við varnargarða sem þar eru ofan byggðar. Það snjóflóð þveraði Strandgötu, sem liggur út úr Neskaupstað, og í sjó fram. 

Rýma svæði 16 og 17Hús á rýmingarsvæðum 16 og 17, samtals sjö götur, verða rýmdar vegna snjóflóðahættu.

Fyrst í morgun var tilkynnt um að rýma eitt hús vegna flóðsins en fljótlega var ákveðið að rýma sjö íbúðahúsagötur á rýmingarsvæðum í kringum Starmýri, þar sem flóðið féll á hús. Í tilkynningu sem barst frá lögreglu rétt fyrir 9 kom fram að björgunarsveitir væru að ganga í hús sem þyrfti að rýma. Fjöldahjálparstöð hefur verið opnuð í Egilsbúð, þar sem tekið er á móti fólki sem þarf að yfirgefa hús sín. 

„Íbúar Neskaupstaðar annars beðnir um að halda sig heima við,“ segir í tilkynningunni. 

Unnið er að meta aðstæður annars staðar í þéttbýlinu. Íbúar eru hvattir til að halda kyrru fyrir, hlémegin í húsum og bíða frekari upplýsinga. Íbúar annars staðar á Austurlandi hafa einnig verið beðnir að halda sig heima við. 

Öllu skólahaldi hefur verið aflýst í Fjarðabyggð sem og almenningssamgöngum. Þetta kemur fram í tilkynningu frá Almannavörnum. 

Óvissustigi vegna snjóflóðahættu hafði verið lýst á Austfjörðum, á milli Neskaupstaðar og Seyðisfjarðar. 

Uppfært klukkan 9.18