Fyrri aukaspurning:

Hver málaði málverkið hér að ofan?

***

Aðalspurningar:

1.  Leo Baekeland var belgískur vísinda- og uppfinningamaður (síðar búsettur í Bandaríkjunum) sem þróaði ákveðið fyrirbæri árið 1907. Aðrir höfðu verið á svipuðum slóðum í uppfinningum sínum, en fyrirbæri Baekelands sló ærlega í gegn. Hann nefndi það eftir sjálfum sér, en fann líka upp á að nota annað heiti sem varð fljótt miklu útbreiddara. Hvaða heiti var það?  

2.  Í hvaða borg voru umdeildir ólympíuleikar haldnir árið 1936?

3.  Hver skrifaði skáldsöguna Stríð og frið?

4.  En skáldsöguna Engla alheimsins?

5.  Allt er þegar þrennt er: Hver skrifaði skáldsöguna Sögu þernunnar?

6.  Hvaða fyrirbæri í Árnessýslu er orðið að alþjóðaheiti yfir samskonar fyrirbæri?

7.  Catherine Middleton ber virðulegan titil. Hver er sá?

8.  Sisimiut er næststærsti þéttbýlisstaðurinn í ákveðnu landi. Hvaða landi?

9.  „Það á að kjósa mig af því að ég er maður.“ Hvaða frambjóðandi lét svo um mælt árið 1980?

10.  UY Scuti heitir stærsta sólstjarnan sem vísindamenn hafa enn komið auga á — þá er átt við að þvermáli en ekki þyngd. Hversu miklu stærri er UY Scuti en sólin okkar? Er þessi stóra sól 1,7 sinnum stærri en okkar sól — 17 sinnum stærri — 170 sinnum stærri — eða 1.700 sinnum stærri? 

***

Seinni aukaspurning:

Sokkar eins og þeir sem sjást hér að ofan voru vinsælir á Vesturlöndum um 1940-1950 og hafa svo öðruhvoru komist í tísku síðan. Hvað kallast þeir?

***

Svör við aðalspurningum:

1.  Plast.

2.  Berlín.

3.  Tolstoj.

4.  Einar Már.

5.  Atwood.

6.  Geysir.

7.  Hertogaynjan af Cambridge.

8.  Grænlandi.

9.  Vigdís Finnbogadóttir.

10.  1.700 sinnum stærri.

***

Svör við aukaspurningum:

Málverkið er eftir Dalí.

Sokkarnir nefnast Bobby Socks.