Engin svör fást frá Samherja um þær dylgjur sem fram koma í afsök­un­ar­beiðni sem fyr­ir­tækið birti óund­ir­rit­aða á vef sínum um helg­ina.

Þar var umfjöllun af mál­efnum fyr­ir­tæk­is­ins sögð „ein­hliða, ósann­gjörn og ekki alltaf byggð á stað­reyndum“. Var það gert í sama mund og fyr­ir­tækið baðst afsök­unar á við­brögðum sínum. 

Það fæst þó heldur ekki skýrt nákvæm­lega hvaða við­brögðum beðist er afsök­unar á. 

Engar útskýringar fást

„Við höfum því ekki í hyggju að veita við­töl eða fjalla frekar um hana að svo stöddu,“ segir Þor­steinn Már Bald­vins­son, for­stjóri Samherja, í svari við fyr­ir­spurn Stund­ar­innar um afsök­un­ar­beiðn­ina. Hann segir yfir­lýs­ing­una skýra og afdrátt­ar­lausa og að hún hafi „fallið í góðan jarð­veg“.

Í svar­inu segir hann þó að félagið hafi beðist afsök­unar á „þætti félags­ins í harka­legri fjöl­miðlaum­fjöllun að und­an­förnu“. Er það í sam­ræmi við lýs­ingar málsvara fyr­ir­tæk­is­ins, til að mynda „skæru­liða­deild­ar­innar“ sem Stundin og Kjarninn afhjúp­uðu nýverið, og var til­efni afsök­un­ar­beiðn­innar, að blaða- og frétta­menn væru í ein­hvers­konar átökum við Samherja. Að frétta­flutn­ingur af Namib­íu­mál­inu svo­kall­aða væru átök tveggja stríð­andi fylk­inga. 

Kröfðu ráðherra um nákvæm svör

Kjarninn greindi svo frá því í gær að lög­maður Samherja hafi aðeins fyrir nokkrum vikum krafið Lilju Dögg Alfreðs­dóttur, mennta- og menn­ing­ar­mála­ráð­herra, nákvæmra svara um orð hennar í þing­inu. Þar hafði hún sagt Samherja hafa gengið of langt í við­brögðum sínum. 

Hún hafði við sama til­efni talað um orra­hríð blaða- og frétta­manna og fyr­ir­tæk­is­ins. 

Í bréf­inu, sem Arnar Þór Stef­áns­son, lög­maður Samherja, sendi fyrir hönd fyr­ir­tæk­is­ins var Lilja krafin útskýr­inga af „tölu­verðri nákvæmni“. „Var það t.d. of langt gengið að skjóta mál­inu til siða­nefndar Rík­is­út­varps­ins eða að fjalla um nið­ur­stöð­una? Var það mynd­banda­gerðin um nið­ur­stöð­una sem gekk of langt?“ spurði lög­mað­ur­inn. 

Lilju Dögg var gefin vika til að svara erind­inu. Því hefur enn ekki verið svarað, nú fimm vikum síðar. 

Stundin óskaði í gær eftir við­tali við Þorstein Má, eða eftir atvikum aðra for­svars­menn fyr­ir­tæk­is­ins, vegna Namib­íu­máls­ins. Þeirri beiðni var ekki svarað.