„Við förum ekki í graf­götur með það í verka­lýðs­hreyf­ing­unni að við höfum gríð­ar­legar áhyggjur af því að það sé verið að taka hags­muni fárra, valda­mik­illa fyr­ir­tækja í sam­fé­lag­inu fram yfir heilsu og hags­muni þjóð­ar­innar.“ Þetta segir Ragnar Þór Ing­ólfs­son, for­maður stétt­ar­fé­lags­ins VR. Í sam­tali við Stundina seg­ist hann harma þá stöðu sem hefur skap­ast í sam­fé­lag­inu með sér­hags­muna­poti og áróðri fjár­sterkra afla.

Eins og til­kynnt var fyrr í dag taka gildi nýjar sótt­varn­ar­reglur á mið­nætti vegna þeirra smita sem greinst hafa síð­ustu daga. Sam­komu­tak­mark­anir miða við tíu manns, og öll­um skól­um lands­ins verð­ur lok­að til að minnsta kosti 1. apr­íls. Þar að auki verður sund­stöðum og lík­ams­rækt­ar­stöðvum óheim­ilt að hafa opið, og krám og skemmti­stöðum verður lokað.

„Það er útséð að páska­fríið er nán­ast farið hjá mörgum,“ segir Ragnar. „Það er alveg ljóst mál að stór fyr­ir­tæki eins og til dæmis Icelandair og stærri aðilar ferða­þjón­ust­unnar sem hafa þrýst á eftir opnun landamæra í stað þess að bíða í tvo til þrjá mán­uði á meðan að landið er bólu­sett bera hér mikla ábyrgð.“

Nefnir hann að fólkið í land­inu hafi lagst á eitt til að ná niður fyrri smitum, en að ekki allir hafi lagt jafn mikið á sig. „Þetta er alveg skelfi­leg staða að vera í, þegar að okkur hefur tek­ist nokkrum sinnum mjög vel til að ná þessu niður með sam­stilltu átaki – ekki endi­lega átaki fyr­ir­tækj­anna heldur þjóð­ar­innar og allra – að missa þetta svona úr hönd­unum. Mér finnst þetta hræði­legt. Ég vona svo sann­ar­lega að þessar hertar aðgerðir verði til þess að okkur tak­ist að ná þessu niður í stað þess sem við erum að sjá í lönd­unum í kring um okkur þar sem enn eina ferð­ina er allt komið úr bönd­unum og eng­inn ræður við eitt né neitt.

„Á sama tíma og þjóðin er að kalla eftir því að getað áfram hist og verið saman þá eru hags­muna­öflin akkúrat hinum megin sem vilja tefla öllu í tví­sýnu“

„Á sama tíma og þjóðin er að kalla eftir því að getað áfram hist og verið saman þá eru hags­muna­öflin akkúrat hinum megin sem vilja tefla öllu í tví­sýnu, og það þegar við eigum svo stutt eftir. Við vorum farin að sjá fyrir end­ann á þessu, og það er grát­legt að þurfa að horfa upp á þessa stöðu.“

Telur ferðasumrinu hafa verið stefnt í hættu

Ragnar telur að ljóst að þessi fljót­færni fáeinna aðila gæti stefnt ferða­sumr­inu í hættu. „Það er ljóst mál að ef fólkið okkar getur ekki ferð­ast landið í sumar þá mun það hafa gríð­ar­lega mikil áhrif fyrir marga aðila.“

Ragnari finnst ólík­legt að þessi for­gangs­röðun muni ekki hafa áhrif á val kjós­enda fyrir alþing­is­kosn­ingar í haust. „Það versta af öllu er að horfa upp á mjög fámennan og háværan hóp sér­hags­muna ná að þvinga fram algjörri breyt­ingu á nálgun okkar gagn­vart veirunni þvert á ráð­legg­ingar sótt­varn­ar­læknis og þeirra sem hafa staðið í fremstu lín­unni. Mér finnst þetta vera mjög umhugs­un­ar­vert, og ég gæti trúað að kjós­endur fyrir næstu alþing­is­kosn­ingar muni taka þetta með sér inn í kjör­klef­ann, hverra hags­muna rík­is­stjórnin og laga­setn­ing þeirra hefur raun­veru­lega verið að gæta þegar er verið að taka svona stórar ákvarð­anir, eins og til dæmis hvernig og hvenær eigi að opna landið.“