Sóttvarnaráðstöfunum hefur verið breytt eftir erindi frá Kynnisferðum þannig að heimilt er að flytja komufarþega frá Keflavíkurflugvelli og öðrum landamærastöðum með hópbifreið. Embætti landlæknis mælir hins vegar ekki með því að fólk sæki farþega á einkabílum.

Stundin greindi frá því í síðustu viku að Kynnisferðir, eða Reykjavík Excursions, fyrirtækið sem rekur Flybus rútuferðirnar til og frá Keflavíkurflugvelli, hefði haldið áfram að flytja komufarþega frá vellinum til höfuðborgarsvæðisins eftir að nýjar reglur um sóttvarnir tóku gildi. Samkvæmt þeim er óheimilt fyrir komufarþega að taka strætisvagn eða rútu frá Leifsstöð þar sem þeir teljast í sóttkví frá því að þeir yfirgefa landamærastöð.

Sendu Kynnisferðir erindi til yfirvalda til að mótmæla reglunum og fór það til meðferðar á meðan fyrirtækið keyrði áfram. Ferðamálastofa, Samgöngustofa, embætti landlæknis og almannavarnadeild ríkislögreglustjóra birtu svo í gær leiðbeiningar þar sem akstur komufarþega með hópbifreiðum er aftur heimilaður. Heimilt er nú að flytja farþega sem eru komnir í sóttkví með hópbifreið með því skilyrði að einungis helmingur leyfðra sæta sé fylltur og að farþegar séu með andlitsgrímur.

Samkeppnisaðilar Kynnisferða fluttu ekki farþega eftir að reglunum var breytt á miðvikudag í síðustu viku. Airport Direct stöðvaði rútuferðir frá flugvellinum samkvæmt þjónustuveri og Strætó birti tilkynningu þess efnis að komufarþegum væri óheimilt að nota almenningssamgöngur á leið sinni á sóttkvíarstað.

Nýju reglurnar gilda hins vegar ekki um Strætó þar sem vagnarnir teljast til almenningssamgangna en ekki hópbifreiða.

Mæla ekki með að sækja fólk á völlinn

Bannið við akstri komufarþega með hópbifreiðum var fyrst birt í upplýsingum á vefsíðu embættis landlæknis sem tóku gildi miðvikudaginn 19. ágúst. Hefur orðið „hópbifreiðar“ nú verið fjarlægt af síðunni, en áfram er óheimilt fyrir komufarþega að ferðast með áætlunarflugi innanlands og almenningssamgöngum. „Nota má leigubíla auk einkabíla og bílaleigubíla,“ segir á síðunni.

Í svari við fyrirspurn Stundarinnar til embættisins um hvað þetta þýðir kemur fram að komufarþega sé heimilt að keyra sinn eigin einkabíl frá flugvellinum. „En ef einhver getur komið með bíl fyrir þig og skilið eftir á vellinum þá er það líka hægt,“ segir Guðrún Aspelund, yfirlæknir á sóttvarnasviði. „Eða þú getur tekið leigubíl eða bílaleigubíl. Eins hefur flugrútan verið að ganga og hægt að nota hana þó viðkomandi sé í sóttkví. Ef einhver sækir þig þá myndi sá lenda í sóttkví (og gæti smitast) ef þú reynist smitaður svo við mælum ekki með því.“

„Ef einhver sækir þig þá myndi sá lenda í sóttkví (og gæti smitast) ef þú reynist smitaður svo við mælum ekki með því“

Kynnisferðir eru í meirihlutaeigu fjölskyldu Bjarna Benediktssonar, fjármála- og efnahagsráðherra, sem oftast er kölluð Engeyjarættin. Félagið Alfa hf. á 65 prósent hlut í fyrirtækinu og eru stærstu hluthafar þess Benedikt Sveinsson, faðir Bjarna, Guðríður Jónsdóttir, móðir Bjarna, Jón Benediktsson, bróðir Bjarna, Einar Sveinsson, föðurbróðir Bjarna, og börn Einars.