Snyrtivörur fyrir húð eru oftast markaðssettar til kvenna enda samræmast þær hugmyndum okkar um kvenleika. Algengt er að húðvörur sem ætlaðar eru körlum séu markaðssettar til að endurspegla virkni og hreysti manna, frekar en til að draga fram fegurðina og fínleikann. Þrátt fyrir að hugmyndir um karlmennsku og kvenleika virðast sem náttúrulegt afsprengi af innra eðli einstaklinga, þá eru þær afurð samfélagsins. Þær eru félagsleg afurð en ekki líffræðileg afleiðing. Hugmyndir um kvenleika og karlmennsku eru múraðar inn í menningu sem fólk leikur síðan eftir, í samspili stofnana, markaðar og annars fólks.
Nauðsynlegt er að brjóta upp múrinn því hann skapar staðalmyndir sem hamla frelsi og tækifærum fólks. Frelsið fæst meðal annars með því að ögra eða skjöna viðteknar karlmennsku- og kvenleikahugmyndir. Markmiðið með skjönun er þá að höggva í múr fastmótuðu hugmyndanna, til að mynda sprungur fyrir aukið svigrúm einstaklinga. Svigrúm utan staðalmynda sem, í víðara samhengi, veita aukin tækifæri, lífsgæði og styðja jafnrétti.
Ein leið sem strákar eða karlar geta farið í þessum tilgangi er að stíga inn í kvenleikann. Stíga inn á svið sem eignuð eru konum og kvenleika. Ég leitaði til Halldóru Birtu förðunarfræðings og bað hana um að miðla ráðum til stráka og karla sem hafa áhuga á að nota förðunarvörur, hvort sem er til ögrunar eða bara til að vera aðeins sætari. Enda vilja menn stundum vera sætir og fínir og hafa sig til fyrir ákveðin tilefni. Jón Már Ásbjörnsson sat fyrir sem módel, Davíð Þór Guðlaugsson tók myndir af hverju skrefi sem Halldóra Birta lýsir undir hverri mynd.
1 Rakakrem
Byrja á að setja rakakrem á allt andlitið og augnkrem undir augun. Þetta ætti að vera hluti af daglegri húðrútínu hvort sem markmiðið er að farða sig eða ekki.
2 Sólardropar
Þeir sem vilja smá brúnku og verða ferskari án mikillar fyrirhafnar geta bætt við sólardropum og sett á efstu punkta andlitsins sem eru enni, kinnbein, nef og haka.
3 Litað dagkrem
Fyrir þá sem vilja jafnari húðlit á allt andlitið mælum við með BB kremi eða öðru lituðu dagkremi. Berið það á í þunnu lagi með fingrum yfir allt andlit. Ef það er roði í húðinni er mælt með kremi með gulum undirtón.
4 Hyljari
Til að leiðrétta enn frekar liti í andlitinu eins og rauðar bólur eða bláma undir augum skal nota hyljara í litlu magni á svæðið. Þumalputtareglan er að nota rauðtóna hyljara á bláma (undir augu) en gultóna hyljara á roða (bólur, rósroða o.fl.)
5 Púður
Þeir sem kjósa matta áferð á húðinni og vilja síður glansa þá er mælt með að púðra húðina með glæru/litlausu púðri. Einnig er hægt að fá litað púður en þá er mælt með að nota púður með lítilli þekju svo það verði ekki of þykkt á húðinni. Hér þarf helst að eiga miðlungsstóran bursta í verkið.
6 Sólarpúður
Best er að nota matt sólarpúður fyrir þá sem vilja skerpa aðeins á brúnkunni. Þetta má nota samhliða brúnku/sólardropunum sem voru nefndir hér áður en líka eitt og sér. Passa bara að nota ekki of mikið svo maður líti ekki út fyrir að vera appelsínugulur í framan. Hér er gott að eiga léttan miðlungsbursta í verkið.
7 Augnbrúnagel
Fyrir þá sem eru með óstýrilátar augabrúnir er gott að nota glært augnbrúnagel og greiða létt í gegn í átt að gagnaugum. Fyrir þá sem eru með ljósar augabrúnir og vilja skerpa þær aðeins má nota örlítið af lituðu geli.
Flestir myndu sætta sig við það sem búið er að gera hingað til en fyrir þá sem vilja taka þetta skrefinu lengra er hægt að bæta við:
1 Skygging
Gott er að nota grábrúnan skyggingalit en hann er líkastur náttúrulegum skugga húðarinnar. Liturinn er settur með þéttum miðlungsstórum bursta undir kinnbein, efst í kollvik og undir kjálka eða höku eða hvar sem óskað er eftir að draga inn ákveðin svæði.
2 Krulla augnhár
Til að krulla augnhár þarf töluverða æfingu. Opna þarf augað vel og ná flestum augnhárunum inn í greiðuna, klípa svo létt saman nokkrum sinnum. Þetta opnar augun, sérstaklega fyrir þá sem eru með mjög bein og stíf augnhár.
3 Augnháragel
Best er að nota glæra gelið sem notað var í augabrúnirnar til að festa betur formið á augnhárunum eftir að búið er að krulla þau.
4 Setting sprey
Gott að halda höndinni eins langt frá andlitinu og hún nær og spreyja jafnt yfir allt andlitið til að festa saman allar vörurnar sem voru notaðar á andlitið.
Bodyshop gaf vörurnar sem Halldóra Birta notaði.
Kynjamál
Jón Viðar biðst afsökunar: „Þetta var ósmekklegt hjá okkur“
„Ég upplifi í þessari viku eins og árið hafi einungis verið slæmur draumur“
Ritstjóri Morgunblaðsins segir „offorsið“ gegn séra Ólafi dæmi um galdrabrennu
Segir hræsni að vilja rýmka réttinn til þungunarrofs en banna nektardans
Ríkið greiddi félagsgjöldin í tengslanet atvinnulífs og stjórnmála
Athugasemdir