Starfs­fólk versl­ana Lyfju hefur und­an­farnar vikur sinnt störfum sínum með hjálma á höfði, en þeim er ætlað að hindra smit kór­óna­veirunnar. Alfreð Ómar Ísaksson lyf­sali í Lyfju í Hafn­ar­stræti segir að hjálm­arnir hafi van­ist nokkuð vel og þeir séu til lít­illa trafala í starfi.

„Þeir eru not­aðir til að draga úr smiti, sér­stak­lega dropa­smiti sem getur komið frá fólki þegar það hóstar. Þannig að þetta er vörn fyrir okkur,“ segir Alfreð.

Hann segir að almennt hafi verið jákvætt við­horf starfs­fólks gagn­vart þessum höf­uð­bún­aði. „Þetta hindar reyndar svo­lítið sam­skiptin. Fólk heyrir síður í okkur, einkum eldra fók. En þá verðum við bara að brýna raustina vel til að koma skila­boðum til skila.“

Vel varinAlfreð Ómar Ísaksson lyf­sali, Thelma Björk Krist­ins­dóttir lyfja­tæknir og Helga Gunn­ars­dóttir umsjón­ar­maður versl­unar. Öll starfa þau í Lyfju í Hafn­ar­stræti þar sem starfs­fólk hefur borið hjálma und­an­farnar vikur.

Mynd: Davíð Þór

Hann segir að við­skipta­vinir hafi ekki látið sér bregða í brún við að sjá þennan höf­uð­búnað og seg­ist ekki þekkja til þess að hjálmar sem þessir séu not­aðir við aðra starf­semi eða í öðrum versl­unum en Lyfju. Vel megi hugsa sér að rak­arar, hár­greiðslu­fólk og aðrir, sem starfa í mik­illi nálægð við við­skipta­vini sína, noti hjálma sem þessa þegar slík starf­semi verður opnuð eftir helgi.

„Þetta hindar reyndar svo­lítið sam­skiptin. Fólk heyrir síður í okkur, einkum eldra fók. En þá verðum við bara að brýna raustina vel“

Alfreð segir óvíst hvort  búast megi við hjálmum á höfðum starfs­fólks Lyfju eftir að sam­komu­bannið verður rýmkað 4. maí. „Það verður bara metið á hverjum tíma fyrir sig. Tímarnir eru svo breyti­legir núna frá degi til dags. En ég reikna með að við notum þetta eitt­hvað áfram.“

Venst þetta vel? „Já, það gerir það.“

Hömstruðu hitamæla

COVID-19 far­ald­ur­inn hefur sett tals­verðan svip á vöru­úr­val og vin­sældir ein­stakra vöru­teg­unda í apó­tekum. Í Lyfju í Hafn­ar­stræti hafa hita­mælar og hand­spritt rokið úr hill­unum und­an­farnar vikur, eins og víða ann­ars staðar, og náði salan hápunkti í lok mars og byrjun apríl. Heldur er farið að hægja á sölu þessa varn­ings nú, þegar hillir undir aflétt­ingu ýmissa tak­mark­ana.

 „Fólk keypti hand­spritt í lítra­vís, það fóru margir að hamstra þegar fór að spyrj­ast út að það væri lítið til á mark­aðnum og það seld­ist upp hjá okkur um tíma,“ segir Alfreð.  „Þá þurftum við að skammta fólki spritt og hver og einn mátti bara kaupa eina flösku. Það hefur reyndar hægt á söl­unni und­an­farið.“

LyfsaliAlfreð Ómar Ísaksson lyf­sali í Lyfju Hafn­ar­stræti segir að starfs­fólk hafi verið jákvætt gagn­vart því að bera hjálm­ana. „Þetta hindar svo­lítið sam­skiptin. Fólk heyrir síður í okkur, einkum eldra fók. En þá verðum við bara að brýna raustina vel,“ segir Alfreð

Mynd: Davíð Þór

Hann segir að lík­lega hafi verið slegið met í sölu hita­mæla. „Þeir seld­ust upp hjá okkur eftir að fólki var ráð­lagt að fylgj­ast með lík­ams­hit­anum. Reyndar held ég að fyrir um tveimur til þremur vikum hafi þeir verið nán­ast ófá­an­legir í land­inu, en núna eru þeir komnir aftur,“ segir Alfreð.

Þótti kaup ferðamanna á spritti og grímum sérstök

„Í jan­úar og febr­úar kom hingað mikið af kín­verskum ferða­mönnum sem keyptu mikið af hand­spritti, hita­mælum og and­lits­grímum. Og ferða­menn frá fleiri löndum, sér­stak­lega Bretar, keyptu líka miklar birgðir,“ segir Thelma Björk Krist­ins­dóttir lyfja­tæknir í Lyfju Hafn­ar­stræti. 

„Enda var þetta nán­ast ófá­an­legt í mörgum löndum um tíma,“ bætir Alfreð við. „Okkur fannst þetta sér­stakt, við átt­uðum okkur auð­vitað ekki á því þá hver staðan yrði hjá okkur bara örfáum vikum síðar.“