Um hundrað einstaklingar úr röðum hægri öfgamanna, víðsvegar að úr Evrópu streyma nú til eyjarinnar Lesbos sem og annarra staða í Grikklandi. Þeir kalla eftir fleirum til þess að taka þátt í baráttu sinni um „að verja Grikkland fyrir íslömsku flóttafólki“. Þetta kemur fram í umfjöllun Berliner Zeitung. Markmiðið ku meðal annars vera að herja á blaðamenn, hjálparstarfsmenn og flóttafólk á svæðinu með ofbeldi og ógnunum, en nú þegar hefur verið greint frá því að evrópskir hægri öfgamenn hafi komið sér fyrir á lesbos. Stundin hefur að undanförnu greint frá því hvernig þeir hafa síðustu daga og vikur ráðist gegn hjálparstarfsfólki, læknum, blaðamönnum og flóttafólki á eyjunni. Þá hefur meðal annars verið kveikt í flóttamannabúðum og birgðageymslum.

Sumir með reynslu af hernaði

Þýska blaðið Berliner Zeitung greindi frá því í gær að þýskir nýnasistar og hægri öfgamenn ræði nú um það á spjallrásum að fjölmenna til Grikklands. Í dreifibréfi sem þeir dreifa á milli sín, og á uppruna sinn hjá frönsku nýnasistasamtökunum „samtökum um franska sjálfsmynd“, kemur fram að að hundrað franskir þjóðernissinnar, þar á meðal fyrrum hermenn, séu nú þegar lagðir af stað til Grikklands. Bréfið er einskonar herkvaðning þar sem aðrir herskáir hægri öfgamenn eru hvattir til þess að fjölmenna til Grikklands til varnar Evrópu.

Þá kemur fram að sumir þeirra sem eru nú á leiðinni til landsins, hafi hlotið herþjálfun og reynslu af hernaði sem málaliðar í Króatíu, Líbanon, Bosníu og Donbass. Áfangastaðirnir eru sagðir á eyjunum Lesbos og Chios, en líka í Aþena og á tyrknesku landamærunum á meginlandinu. Meginmarkmið nýnasistananna er að „afgreiða“ blaðamenn og sjálfboðaliða sem aðstoða flóttafólk, eins og þeir komast að orði. Þá fyrirhuga þeir að taka ljósmyndir, myndbönd og framleiða efni til dreifingar á samfélagsmiðla. 

Meðlimur þýska þjóðernisflokksins á svæðinu

Berliner Zeitung segir ómögulegt að áætla hversu margir hægri öfgamenn frá Vestur-Evrópu séu þegar komnir til Lesbos og að landamærum Tyrklands. Í myndbandi af átökum sem brutust út við höfnina á Mytilini á Lesbos síðastliðinn föstudag, og hefur fengið dreifingu á internetinu, má meðal annars sjá þýska stjórnmálamanninn, Jonathan Stumpf, meðlim þýska þjóðernisflokksins, sem og Mario Müller hjá samtökum um franska sjálfsmynd. Blaðið hefur ekki fengið upplýsingar um það hvað þeir hafi verið að gera á eyjunni.

Der Spiegel hefur greint frá ítrekuðum árásum hægri öfgamanna á eyjunni Lesbos að undanförnu. Þannig er því meðal annars lýst hvernig hægri öfgamenn komu saman þar sem samfélagsmiðstöð fyrir flóttfólk hafði verið brennd til grunna. Miðstöðin tilheyrði svissnesku samtökunum „One Happy Family“. Nýnasistar sögðu að það hefði veirð kveikt í henni þar sem samtökin hefðu verið að stuðla að því að flytja ólöglega innflytjendur til Grikklands.

Börnin ekki send til Grikklands

Grikkir hafa þegar tekið við 115 þúsund flóttamönnum. Flóttamannabúðir eru yfirfullar og aðstæður fólksins hryllilegar og önnur evrópuríki hafa heitið því að létta birðinni með því að taka við fólki þaðan, enda hæliskerfið nú þegar löngu orðið yfirfullt. Þannig hafa Portúgalir, Frakkar og Finnar meðal annars heitið því að taka við fólki frá landinu til þess að létta undir með Grikkjum. Þá lýstu Þjóðverjar því yfir í fyrradag að þeir myndu taka við 1.500 manns frá Grikklandi. Á sama tíma fyrirhuguðu íslensk stjórnvöld að senda fimm barnafjölskyldur til landins.

Sema Erla Serdar, stofnandi hjálparsamtakanna Solaris, greindi frá því í gær að búið væri að fresta brottvísun ungu flóttabarnanna Ali, Kayan, Saja og Jadin og ungra foreldra þeirra frá Írak til Grikklands um óákveðinn tíma. „Sú skýring sem gefin er á því er að brottvísunin strandar á grískum stjórnvöldum sem segjast ekki geta tekið á móti þeim vegna aðstæðna þar!“ Upplýsingafulltrúi Útlendingastofnunar segir hinsvegar ekki rétt að grísk stjórnvöld hafni því að taka við einstaklingum sem hafi fengið alþjóðlega vernd þar í landi. Brottvísun fjölskyldu og einstaklings til Grikklands sé enn í bígerð, þó að henni hafi verið frestað aftur.

Aðstæður flóttafólks í Grikklandi hafa lengi verið bágbornar og fjöldi alþjóðstofnana og samtaka á borð við UNICEF og Rauða krossinn ítrekað fordæmt brottvísanir á börnum þangað. „Það er ekki með nokkru móti hægt að réttlæta brottvísanir á börnum til Grikklands,“ sagði Rauði krossinn á Íslandi í tilkynningu sem samtökin sendu frá sér þann 4. mars síðastliðinn til þess að mótmæla umræddum brottvísunum.