Boeing, stærsti flugvéla- og loftfaraframleiðandi heims, hefur stöðvað framleiðslu á 737 Max vélunum. Þær hafa verið kyrrsettar frá því 28. mars, um allan heim, og því verið ónothæfar í farþegaflugi.
Eitt þeirra flugfélaga sem hafa orðið fyrir miklu tjóni er Icelandair, en í síðustu tilkynningu frá félaginu þar sem fjallað var um kyrrsetninguna kemur fram að félagið geri ráð fyrir að Max vélarnar komi til notkunar í mars. Ekki liggur fyrir enn hvenær kyrrsetningu verður aflétt, og er það meðal annars þess vegna sem framleiðslan hefur tímabundið verið stöðvuð.
Um 40 vélar hafa komið úr framleiðslu á mánuði, hjá Boeing, en þegar mest var voru þær 53. Boeing er stærsta útflutningsfyrirtækja Bandaríkjanna og eru starfsmenn fyrirtækisins um 80 þúsund á Seattle svæðinu, þar sem hjartað í framleiðslu fyrirtækisins hefur verið frá stofnun.
Ástæðan fyrir kyrrsetningunni eru flugslys í Indónesíu 29. október í fyrra og í Eþíópíu 13. mars, en í þeim létust allir um borð, samtals 346. Frumniðurstöður rannsókna í löndunum fyrrnefndu benda til þess að vélarnar hafi verið með gallað MCAS-kerfi, sem á að sporna gegn ofrisi, og því hafi þær togast til jarðar með fyrrnefndu afleiðingum.
Fjölmargar athugasemdir hafa einnig komið fram í rannsóknum annarra á Boeing, þar á meðal hjá alríkislögreglunni FBI. Auk þess er Bandaríkjaþing ennþá að rannsaka félagið og hvernig það stóð að upplýsingagjöf til bandarískra flugmálayfirvalda og eftirlitsaðila. Í yfirheyrslum í þinginu hafa stjórnendur Boeing verið harðlega gagnrýndir fyrir að upplýsa ekki um galla í vélunum, og einnig að slaka á eftirliti með framleiðslunni.
Kyrrsetningin á Max vélunum hefur haft mikil áhrif víða um heim, ekki síst á Íslandi. Í Peningamálum Seðlabanka Íslands sem komu út í nóvember, segir að samdráttur í ferðaþjónustu á árinu hafi ekki síst átt sér stað vegna kyrrsetningar á Max vélunum, sem hefur leitt til þess að Icelandair hefur þurft að draga úr sætaframboði.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir