„Við erum alls ekki að tala fyrir því að allt bankakerfið eða allur hlutur ríkisins sé seldur á einni nóttu. En það gæti mögulega, til lengri tíma litið, verið betra að fá inn einkaaðila þar. Þá er auðvitað gríðarlega mikilvægt að regluverkið og eftirlitið sé traust.“ Það eigi að tryggja að Ísland lendi ekki í sambærilegum hremmingum og síðast þegar bankarnir voru í eigu einkaaðila.
Þetta segir Kristrún Tinna Gunnarsdóttir, hagfræðingur hjá Oliver Wyman í Svíþjóð sem sat í starfshópnum sem skrifaði Hvítbók um framtíðarsýn fyrir fjármálakerfið, í viðtali við Þórð Snæ Júlíusson, ritstjóra Kjarnans, í sjónvarpsþættinum 21 á Hringbraut sem sýnt verður í kvöld. Þátturinn hefst klukkan 21 og hægt er að sjá stiklu úr honum hér að neðan:
Kristrún Tinna segir að það sé alltaf áhætta af fjárfestingum og óvissa ríki um verðþróun fjármálafyrirtækja sem ríkið taki á sig sem eigandi. Auk þess sé það líka varhugavert að vera með mörg egg í sömu körfunni.
[adspot]Þótt arðgreiðslur úr bönkunum sem endurreistir voru eftir bankahrunið hafi hlaupið á hundruð milljörðum króna á síðustu árum, og að mestu runnið til ríkisins, þá sé það tímabil á enda runnið að mati Kristrúnar Tinnu. „Þegar fjármunir voru færðir frá gömlu bönkunum yfir til þeirra nýju þá var gert verðmat á eignunum sem var hóflega áætlað og því hafa verið allskonar endurútreikningar sem hafa skapað hagnað hjá bönkunum sem er ekki af reglulegri starfsemi, í rauninni getur maður sagt hálfgerðan pappírshagnað. Núna er það tímabil að líða undir lok þannig að maður sér það bara á uppgjörum bankanna að það er núna grunnreksturinn sem er að skila arðinum. Og þá verður bara skýrara og skýrara að grunnrekstur bankanna er að skila lægri ávöxtun.“
[links]Hún segir að það hafi verið jákvætt að ríkið hafi verið sá aðili sem hafi hagnast á þeirri óvenjulega háu arðsemi sem verið hafi af bankastarfsemi vegna þessara sérstöku aðstæðna á undanförnum árum og óvissa ríkti um raunverulegt virði eigna bankanna. „En núna erum við í rauninni að fara inn í aðeins eðlilegra rekstrarumhverfi þar sem að grunnreksturinn þarf að standa undir þeirri arðsemiskröfu sem er gerð.“
Í viðtalinu ræðir Kristrún Tinna einnig ýmsa aðra anga Hvítbókarinnar, meðal annars þær kannanir sem starfshópurinn lét gera um viðhorf almennings til fjármálakerfisins, álagningu á íbúðarlánum hérlendis í samanburði við hin Norðurlöndin og sértæka skatta sem leggjast á íslenska banka en ekki samkeppnisaðila þeirra innanlands og erlendis.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir