Áslaug Arna Sig­ur­björns­dóttir dóms­mála­ráð­herra segir Lands­rétt­ar­málið ekk­ert eiga skylt við her­ferðir stjórn­valda gegn pólskum dóm­stólum. Segir hún það vera af og frá að tengja Lands­rétt­ar­málið við óeðli­leg póli­tísk afskipti fram­kvæmda­valds­ins af skipan dóms­valds­ins. Þetta kemur fram í Morg­un­blað­inu í dag.

Rík­is­stjórnin afgreiddi grein­ar­gerð á föstu­dag vegna áfrýj­unar nið­ur­stöðu Mann­rétt­inda­dóm­stóls­ins um að Sigríður Andersen, fyrr­ver­andi dóms­mála­ráð­herra, hefði brotið lög við skipan dóm­ara í Lands­rétt. Málið verður tekið fyrir hjá Yfir­deild dóm­stóls­ins 5. febr­úar.

Kjartan Bjarni Björg­vins­son, for­maður Dóm­ara­fé­lags­ins og dóm­ari við Hér­aðs­dóm Reykja­víkur, hefur sagt það veru­legt áhyggju­efni að pólsk yfir­völd styðji íslenska ríkið í Lands­rétt­ar­mál­inu. „Pólskir dóm­arar hafa und­an­farin ár sætt ofsóknum og skipu­lögðum rógs­her­ferðum stjórnar PiS-flokks­ins sem vill afnema sjálf­stæði dóm­stóla, beita kyn­bundnu mis­rétti og tak­marka sjálf­sögð grund­vall­ar­rétt­indi hinsegin fólks,“ sagði hann í færslu á Facebook fyrir helgi. „Íslensk stjórn­völd eiga forð­ast slíkan félags­skap eins og heitan eld­inn.“

Áslaug segir það alvana­legt að önnur lönd komi sjón­ar­miðum sínum á fram­færi fyrir Mann­rétt­inda­dóm­stólnum. „Við munum bara halda áfram með málið út frá okkar for­sendum og þeim sjón­ar­miðum. Ég tel að Lands­rétt­ar­málið eigi ekk­ert skylt við máls­at­vik í Póllandi. Það er ansi lang­sótt að tengja það saman,“ sagði Áslaug við Morg­un­blaðið.

Hún telur ekki að afstaða pólska rík­is­ins muni hafa áhrif á mála­vexti. „Mann­rétt­inda­dóm­stóll­inn klofn­aði í afstöðu sinni í neðri deild­inni og við teljum minni­hluta­á­litið þar vera vel rök­stutt. Þar kemur meðal ann­ars fram að álit Hæsta­réttar varð­andi túlkun á íslenskum lögum um að dóm­ar­arnir séu lög­lega skip­aðir sé rétt nið­ur­staða,“ sagði Áslaug enn­fremur.