15
Salan á Sigmundi
Jón Trausti Reynisson skrifaði pistil í apríl um hvernig Sigmundur Davíð Gunnlaugsson forsætisráðherra tók yfir flokkinn og síðan landið. Pistillinn kom í kjölfar ítarlegrar forsíðuúttektar Stundarinnar um yfirtöku og hamskipti Framsóknarflokksins. „Það hefur komið í ljós skref fyrir skref að margt það sem við héldum um Sigmund Davíð var ekki raunveruleiki,“ skrifaði Jón Trausti meðal annars.
14
Mundirðu eftir tuskudýrinu Ólöf Nordal?
Í kjölfar frétta af brottvísun tveggja langveikra albanskra barna fyrr í mánuðinum skrifaði Illugi Jökulsson pistil þar sem hann beindi orðum sínum til Ólafar Nordal innanríkisráðherra sem fer fyrir málum hælisleitenda. „Mundirðu ekki örugglega eftir að hrifsa líka af honum tuskudýrið, Ólöf Nordal?“ spurði hann meðal annars.
13
„Þú munt fá lexíuna hóran þín“
Ingibjörg Dögg Kjartansdóttir sagði frá hótunum og árásum manns sem hafði áreitt hana frá árinu 2013, að því að virtist vegna fréttar sem karlkyns kollegi hannar skrifaði árið 2010. „Kolleginn heyrði aldrei frá manninum, sem tók aftur á móti upp á því að senda mér ítrekuð skilaboð þar sem hann kallaði mig hóru, hótaði mér refsingu og beindi sjónum að börnunum mínum. Skilaboðin einkenndust fyrst og fremst af kvenfyrirlitningu, enda var hann ekki að ráðast að mér sem blaðamanni heldur sem konu,“ skrifaði Ingibjörg Dögg.
12
Stelpupussulæti Hallgríms
Guðbergur Bergsson rithöfundur skrifaði pistil í DV í október þar sem hann hæddist meðal annars að Hallgrími Helgasyni kollega sínum fyrir að hafa stigið fram og sagt frá nauðgun sem hann varð fyrir þegar hann var 22 ára gamall. Áslaug Karen Jóhannsdóttir skrifaði pistil þar sem hún rýndi í orð Guðbergs: „Guðbergur hæðist ekki einungis að Hallgrími í pistlinum - hann kvengerir hann. Sveskjusteinninn, myndlíkingin sem Hallgrímur notar í viðtali við Fréttatímann, hafi ekki gengið niður úr sálinni heldur földu móðurlífi í einskonar hommaskáp. Alvöru karlmenn geti þannig ekki orðið fyrir nauðgun, einungis konur eða hommar.“
11
Vændi ritskoðað
Viðtal við mann sem keypti vændi af uppáhalds klámmyndaleikkonu sinni var birt á Pressunni í nóvember síðastliðnum og vakti hörð viðbrögð. Sunna Kristinsdóttir skrifaði pistil um málið fyrir Stundina. „Svona umfjöllun nærir gríðarlega skaðlega umræðu því að hún heldur lífi í mýtunni um að „vændi sé í raun bara frábært dæmi“, „atvinnutækifæri fyrir konur“ og að „við séum í raun bara teprur“ hérna á Íslandi,“ skrifaði Sunna meðal annars.
10
10 hlutir sem hamingjusöm pör gera
Hrefna Hrund Pétursdóttir og Ólöf Edda Guðjónsdóttir sálfræðingar skrifuðu pistil fyrir Stundina þar sem þær deildu nokkrum góðum ráðum sem gott er að hafa í huga í parasamböndum. Eitt það mikilvægasta sem hamingjusöm pör gera er að hrósa hvort öðru, segja þær. „Ekki þarf aðeins að hrósa fyrir stóra viðburði heldur er líka mikilvægt að hrósa fyrir hversdagslega hluti. Þú kemur þreytt heim úr vinnunni og kærasti þinn er búinn að taka til í íbúðinni og elda kvöldmatinn. Þú ert rosalega fegin að núna getur þú slakað á eftir vinnudaginn. Í þessum aðstæðum er mikilvægt að grípa tækifærið og gefa á einhvern hátt til kynna að þú sért þakklát fyrir það sem kærastinn þinn gerði.“
9
Ný fjármálakreppa er óumflýjanleg
Jóhannes Björn greindi hvernig bankaelítan náði að velta skuldum og ábyrgðum yfir á skattgreiðendur. Lausnin á kreppunni mun enda með martröð, segir hann. „Hagkerfið hrundi vegna ofurskulda og því hefur síðan verið haldið gangandi með miklu meiri skuldum. Við skulum ekki blekkja sjálf okkur eða láta blekkjast af áróðri elítunnar sem græðir á „magnaukningu“ og vöxtum sem stanslaust stela sparifé fólks,“ skrifaði hann meðal annars.
8
Stóra bomban árið 2015
Óttar Guðmundsson geðlæknir rifjaði upp Stóru bombuna árið 1930, þegar geðlæknir sagði ráðherra geðveikan. Pistillinn kom í kjölfar ummæla forsætisráðherra um að rof væri á milli raunveruleika og skynjunar hjá þjóðinni. „Þetta er í raun öfug spegilmynd af Stóru-bombumálinu. Þá lýsti geðlæknir ráðherra geðveikan en nú lýsir ráðherra alla þjóð sína geðveika. Hann einn er heilbrigður í fjandsamlegum heimi þar sem fólk er búið að missa öll tengsl sín við veruleikann.“
7
Landsfundur hinna háu kinnbeina
Hugleiðingar Braga Páls Sigurðssonar eftir landsfund Sjálfstæðisflokksins vöktu talsverða athygli í október síðastliðnum. Þar sagði hann meðal annars frá áhugaverðri senu þar sem syni Kjartans Gunnarssonar var meinuð innganga á fundinn. „Kjartan varð mjög hvumsi, og spurði ítrekað hvort dyraverðinum væri alvara, hvort hann vissi ekki hver hann væri, sagði „HA?!“ mjög undrandi, mjög oft, og horfði hneykslaður í hringum sig,“ skrifaði Bragi Páll meðal annars.
6
Ekki láta Jón Gnarr eyðileggja fyrir okkur lífið
Bjarni Pálsson, fyrrverandi skólastjóri Héraðsskólans að Núpi, svaraði ásökunum Jóns Gnarr um skólahald að Núpi í pistli á Stundinni. Jón Gnarr hefur lýst kynferðislegu ofbeldi í héraðsskólanum á Núpi, sem þó enginn samnemanda né kennara kannast við. „Fyrir okkur gamla starfsfólkið á Núpi var skelfilegt að sjá forsíðu Fréttablaðsins þann 17. október síðastliðinn þar sem greinilega átti að ræna okkur ærunni svo og af öllu því samstarfsfólki okkar sem látið er,“ skrifar Bjarni.
5
Morðið á DV
Hallgrímur Helgason útskýrði í pistli hvernig dagblað er drepið. „Maður gerir það hægt og rólega, á þremur til fjórum mánuðum og bindur endahnútinn á hárréttum tíma,“ skrifaði hann meðal annars. „Það tókst að teygja glæpinn yfir svo langan tíma að þjóðin náði „að lifa með honum“, og nánast verða leið á honum, og svo voru hlutirnir bara „orðnir eins og þeir eru“.“
4
Hjúkrunarfræðingur svarar
Verkfall hjúkrunarfræðinga setti sannarlega svip sinn á árið. Bjarni Benediktsson fjármálaráðherra kom fram í viðtali og sagði að hjúkrunarfræðingum hafi verið boðin tuttugu prósent launahækkun. María Ósk Gunnsteinsdóttir hjúkrunarfræðingur svaraði ráðherranum í pistli á Stundinni og sendi samstarfsfólki baráttukveðju. „Ekki láta brjóta niður þessa samstöðu með útúrsnúningi pólitíkusa í fjölmiðlum sem leika sér að tölum til að snúa áliti almennings gegn okkur til þess eins að bæta eigið fylgi. Berjist á móti, ekki lúffa fyrir svo skítlegri framkomu.“
3
Nokkrar staðreyndir um nauðgunarmálið í Hlíðunum
Fáar fréttir hreyfðu jafn mikið við almenningi og forsíðufrétt Fréttablaðsins um að íbúð meints nauðgara í Hlíðum hafi verið útbúin til nauðgana. Margt er enn óljóst í málinu en Jón Trausti Reynisson fór yfir nokkur atriði sem þó liggja ljós fyrir. „Við vitum ekki hvort þeir grunuðu í málinu í Hlíðunum eru sekir. Við vitum hins vegar að fólk er sett í gæsluvarðhald grunað um mun vægari glæpi – glæpi án fórnarlambs eða nytjastuld, fremur en árás á líkama og sál fólks,“ skrifaði hann meðal annars.
2
Hvernig lifðum við þetta af?
Óttar Guðmundsson geðlæknir fjallaði um neikvæð áhrif kröfunnar um vandamála- og áhyggjuleysi í næst vinsælasta pistli ársins. Hann segir öryggiskynslóðina ekki tilbúna fyrir mótlæti, en fyrir fáeinum áratugum ólust börn upp við fjölmargt sem talið er lífshættulegt í dag. „Auðvitað er gott að foreldrar fylgist með börnum sínum en stundum getur umhyggjan gengið út yfir allan þjófabálk og snúist upp í andhverfu sína. Ég velti því stundum fyrir mér hvernig manni tókst að lifa af eigin barnæsku og unglingsár,“ skrifaði Óttar.
1
Láglaunafólk sem situr á gullnámu
Vinsælasti pistill Stundarinnar frá upphafi er pistill Jóhannesar Björns um láglaunafólkið sem situr á gullnámu en vel rúmlega sextíu þúsund manns hafa nú lesið pistilinn. „Dapurleg staða íslensks launafólks er óþolandi vegna þess að landið er feikilega ríkt og lífskjör almennings ættu að vera með því besta sem þekkist í heiminum. Hvergi í heiminum, nema þar sem olían vellur upp úr jörðinni, á svo fámennur og vel upplýstur hópur slíka gnótt verðmæta. Hitt er líka staðreynd að hvergi á norðurhveli jarðar hefur spilling og óstjórn staðið þegnunum eins fyrir þrifum og á Íslandi.“
Athugasemdir