Viðskiptafélagi Eyþórs Arnalds, þáverandi oddvita sjálfstæðismanna í Árborg og formanns bæjarráðs, fékk milljónir króna frá sveitarfélaginu fyrir að kanna möguleikann á því að byggja virkjun í Ölfusá. Virkjunin gekk undir vinnuheitinu Selfossvirkjun en ekkert varð af henni á endanum. Kostnaðurinn við að kanna virkjunarkostinn nam tæplega 13,3 milljónum króna fyrir Árborg. Í fundargerð framkvæmda- og veitustjórnar Árborgar frá því í lok nóvember 2012, þar sem kostnaðurinn við könnun virkjunarkostarins er tilgreindur, kemur ekki fram hversu mikið af milljónunum þrettán hafi runnið til viðskiptafélaga Eyþórs. Fundargerðirnar sýna að Eiríkur kom á marga fundi með sveitastjórnarmönnum vegna virkjunarinnar og kynnti hann hana líka opinberlega á ýmsum fundum.

Í samtali við Stundina segir sveitastjórnarfulltrúi Framsóknarflokksins, Helgi Sigurður Haraldsson, að Eyþór hafi verið helsti hvatamaður þess að kanna virkjunarkostinn en að hann hafi ekki vitað um viðskiptaleg tengsl þeirra Eiríks þegar virkjunarkosturinn var ennþá til skoðunar. 

Eggert Valur Guðmundsson, sveitarstjórnarfulltrúi Samfylkingarinnar og nefndarmaður í framkvæmda- og veitustjórn Árborgar, segir að fjármunirnir frá Árborg vegna skoðunar á Selfossvirkjun hafi að langmestu leyti farið til Eiríks. „Þetta var bara sóun á opinberu fé því hugmyndin um þessa virkjun er bara galin eins og við margoft bentum á.“ Eggert segir að hann minnist þess ekki að vinna Eiríks fyrir Árborg hafi verið boðin út.

Viðskiptafélaginn, verkfræðingurinn Eiríkur Bragason, sem vann fyrir Árborg, á fyrirtækið Íslensk vatnsorka með Eyþóri. Fyrirtækið hefur unnið að því að fá að byggja vatnsaflsvirkjun sem kallast Hagavatnsvirkjun við sunnanverðan Langjökul. Þeir Eyþór og Eiríkur eiga fyrirtækið saman, ásamt Herði Jónssyni, en það félag á svo annað fyrirtæki, Hagavatnsvirkjun ehf., sem stofnað hefur verið utan um virkjunina mögulegu. 

Hagavatnsvirkjun var næstum því sett í nýtingarflokk rammáætlunar á yfirstandandi kjörtímabili. 

Tengsl Eyþórs, Eiríks og Illuga

Eiríkur þessi er einnig forstjóri Orku Energy sem talsvert hefur verið í fréttum í vor vegna tengsla Illuga Gunnarssonar menntamálaráðherra við fyrirtækið. Illugi starfaði meðal annars fyrir Orku Energy þegar hann fór í leyfi frá þingstörfum árið 2011.  

Eyþór Arnalds, sem var sveitastjórnarmaður í Árborg í tvö kjörtímabil frá 2006 til 2014 en er hættur í stjórnmálum, hefur það sem af er árinu verið skipaður af Illuga Gunnarssyni til að gegna trúnaðarstörfum fyrir hans hönd. Hann var skipaður sem formaður leikhúsráðs Þjóðleikhússins, en aðstoðarmaður Illuga lét af því starfi þegar hann réði sig til Símans, og fyrir skömmu skipaði menntamálaráðherra hann til að leiða starfshóp sem greina á fjárhagsvanda Ríkisútvarpsins. Samhliða störfum sínum sem sveitarstjórnarmaður í Árborg var Eyþór í ýmsum fjárfestingarverkefnum á sviði stóriðju, meðal annars í gegnum Íslenska vatnsorku og Strokk Energy.