„Málinu er ekki lokið. Ég óttast að því ljúki aldrei. Ég óttast að þetta mál verði laus endi það sem eftir er af stjórnmálasögunni,“ sagði Helgi Hrafn Gunnarsson, þingmaður Pírata, þegar meðferð trúnaðargagna í innanríkisráðuneytinu, lekamálið, var til umfjöllunar á Alþingi í dag. Umræðan kemur í kjölfar skýrslu stjórnskipunar- og eftirlitsnefndar, sem kom út í síðustu viku. 

Vigdís Hauksdóttir, þingmaður Framsóknarflokks, tók fyrst til máls. Hún sagði Alþingi Íslendinga sett í afar sérkennilega stöðu. „Hér mæli ég fyrir meirihlutaáliti stjórnskipunar- og eftirlitsnefndar sem sett er fram við minnihlutaálit nefndarinnar sem eru viðbrögð minnihlutans í nefndinni við áliti umboðsmanns Alþingis um málefni fyrrverandi innanríkisráðherra. Virðulegi forseti, ég finn þessari málsmeðferð hvergi stað í þingskaparlögum og er einsdæmi í sögu þingsins,“ sagði hún og lagði til að sett yrði á fót lagaskrifstofa við þingið sem hefði meðal annars það hlutverk að skera úr um hvaða mál séu þingtæk og hver ekki.

Líkt og Stundin hefur fjallað um sögðu þingmenn stjórnarmeirihlutans sig frá málinu undir lok málsins og sendu frá sér yfirlýsingu þess efnis að málinu hafi lokið með áliti umboðsmanns Alþingis og afsögn Hönnu Birnu Kristjánsdóttur fyrrverandi innanríkisráðherra. Vigdís áréttaði þessa afstöðu meirihlutans. „Virðulegi forseti, ég ítreka meirihluta meirihluta stjórnskipunar- og eftirlitsnefndar – málinu er lokið.“ 

Ögmundur Jónasson, þingmaður Vinstri grænna, fór næstur yfir skýrslu minnihluta nefndarinnar og niðurstöðu hennar, en minnihlutinn gerir alvarlegar athugasemdir við upplýsingagjöf ráðherra sem hafi verið til þess fallin að draga umfjöllun um málið óþarflega á langinn. 

Spurði út í kostnað vegna málsins

Valgerður Bjarnadóttir, þingmaður Samfylkingarinnar, skoraði á Hönnu Birnu til þess að útskýra hvað hún hafi átt við með þegar hún talaði um ljótan pólitískan leik. Þá sagði hún umhugsunarvert að það þurfti sakamálarannsókn til þess að leiða fram sannleikann í þessu máli. 

Brynjar Níelsson, þingmaður Sjálfstæðisflokksins, fjallaði um hlutverk stjórnskipunar- og eftirlitsnefndar. Hann sagði engar forsendur fyrir nefndina að gera meira með málið enda lægju niðurstöður fyrir að lokinni sakamálarannsókn og áliti umboðsmanns. „Ég lít svo á að nefnd eigi ekki að setja sig í dómarahlutverk og ákveða hver segi satt eða ósatt, eða meta hvort einhver hafi ekki uppfyllt sannleiksskyldu sína gagnvart Alþingi,“ sagði hann meðal annars.