53 ára gamall bóndi og húðflúrari í Borgarfirði er að mynda stjórnmálasamtök til þess að berjast gegn innflytjendum.

Maðurinn, Sverrir Þór Einarsson, er einn þeirra sem er ósáttur við að fjármagn sé sett í að hjálpa flóttamönnum, á meðan mögulegt er að verja sömu fjármunum í að hjálpa Íslendingum.

„Stefna flokksins í málefnum innflytjanda og flóttafólks er einföld. Meðan þjóðin hefur ekki efni á að borga lögreglumönnum, heilbrigðisstarfsfólki og kennurum mannsæmandi laun svo ekki sé talað um öryrkja og gamla fólkið okkar sem lifir við sult og hefur ekki efni á læknis þjónustu, einstæðar mæður við sultarmörk, þá höfum við ekki efni á að moka peningum í flóttamenn,“ segir Sverrir á Facebook-síðu flokksins.

Sverrir Þór Einarsson Einnig þekktur sem Sveddi tattú.

Mynd: Facebook

Ríkisstjórnin ákvað í síðasta mánuði að leggja til við Alþingi að varið yrði einum milljarði á ári næstu tvö árin til fjárstuðnings við alþjóðastofnanir og hjálparsamtök, móttöku flóttafólks og hælisleitenda á Íslandi og aðgerða til að hraða afgreiðslu hælisumsókna á Íslandi.

Mannfall hátt í íbúafjölda Íslands

Sverrir Þór segir flokk sinn hins vegar munu berjast gegn þessari hjálp og svo fjölgun innflytjenda. „Við viljum stífar takmarkanir við innfluttningi flóttamanna þar til við höfum efni á að gera mannsæmandi við gamla fólkið, öryrkja, einstæðar mæður og reka almennilega heilbrigðisþjónustu. Hugsum fyrst um okkar bágstöddu Íslendinga áður en við ausum fjármagni í útlendinga,“ segir á Facebook-síðu flokksins.

Talið er að 130 til 330 þúsund manns hafi látist í borgarastríðinu í Sýrlandi, eftir því hvaða heimildir er stuðst við. Síðari talan jafngildir íbúafjölda Íslands. Auk þess hafa um 2.500 flóttamenn drukknað á leiðinni til Evrópu. Það jafngildir tæplega 40% af íbúum sveitarfélagsins Akraness, þar sem stofnandi Þjóðarflokksins býr. 

„Halda fast í íslensk gildi og venjur“

Einnig vill  Sverrir vinna gegn menningarlegum áhrifum af innflytjendum og halda þess í stað fast í íslenska menningu. „Við viljum halda fast í íslensk gildi og venjur og forðast að hér spretti upp gettó múslíma eða annara útlendra hópa.“

Slagorð flokksins virðist vera „segjum nei við fótfestu íslams á Íslandi“.

Sjálfur kynnir Sverrir sig á Facebook-síðunni sem aðilann að baki flokknum.

„Ég heiti Sverrir Þór Einarsson og er bóndi, bifvélavirki og myndlistamaður. Ég bý uppí Borgarfirði á Höfn undir Hafnarfjalli og starfa líka í Reykjavík fimm daga í viku í stúdío Skinnlist Brautarholti 16.“

Sverrir Þór hefur einnig verið þekktur undir nafninu Sveddi tattú, en hann er meðal annars fyrrverandi meðlimur í vélhjólasamtökunum Fáfni, sem gekk til liðs við Hell's Angels.

Ekki náðist í Sverri Þór í kvöld.