Bæði fram­kvæmda­stjóri, Hlynur Sig­urðs­son, og aðstoð­ar­fram­kvæmda­stjóri, Guð­mundur Daði Rún­ars­son, Flug­stöðvar Leifs Eiríks­sonar fóru í dags­ferð þann 15. októ­ber árið 2013 til að sjá seinni lands­leik Íslands og Noregs í und­ankeppni heims­meist­ara­móts­ins í fót­bolta sem haldin var í Osló. Flug­ferðin var alfarið í boði Icelandair en óljóst er hvort önnur útgjöld hafi verið borguð af flug­fé­lag­inu. Þetta herma heim­ildir Stund­ar­innar innan Isavia.

Alvarlegur hagsmunaárekstur

Alvar­leiki máls­ins snýst einna helst um það að Icelandair er aðeins eitt fjöl­margra flug­fé­laga sem stundar við­skipti við Isavia og hefur félagið því mik­inn hag af því að hafa stjórn­endur jákvæða í sinn garð. Með því að þiggja slík boð getur hæg­lega komið til hags­muna­á­rekstra milli Isavia, sem er opin­bert hluta­fé­lag, og Icelandair sem kaupir þjón­ustu af félag­inu.

Sem fram­kvæmda­stjóri flug­stöðv­ar­innar heyrir Hlynur Sig­urðs­son beint undir for­stjóra Isavia, Björn Óla Hauksson. Hlynur situr enn fremur í fram­kvæmda­ráði Isavia. Hann hefur gegnt stöðu fram­kvæmda­stjóra Flug­stöðvar Leifs Eiríks­sonar frá árinu 2010.

Ekki eins og sýnist

Stundin hafði sam­band við Friðþór Eydal, tals­mann Isavia, síðla mið­viku­dags og spurði hvort það teld­ist eðli­legt að fram­kvæmda­stjóri hjá Isavia færi í slíka boðs­ferð. Hann óskaði eftir að fá fyr­ir­spurn­ina senda í tölvu­póst. Henni hefur ekki verið svarað.

Í sam­tali við Stundina í dag neit­aði Hlynur að tjá sig um boðs­ferð­ina. Hann sagði að frétta­til­kynn­ing yrði sendi út „í dag eða á morgun“ vegna máls­ins. „Við erum að skoða þessi mál og við sendum til­kynn­ingu. Nei, ég tjái mig ekki per­sónu­lega um þetta. Þetta er ekki eins og sýn­ist,“ segir Hlynur. Ekki náð­ist í Guðmund Daða Rún­ars­son, aðstoð­ar­fram­kvæmda­stjóra, vegna máls­ins.

„Þetta er ekki eins og sýn­ist“

Stundin óskaði eftir við­brögðum frá Guðjóni Arn­gríms­syni, upp­lýs­inga­full­trúa Icelandair. Hann seg­ist koma af fjöllum um málið og ekki geta tjáð sig um flug ein­stakra far­þega. „Spurðu þá bara. Ég get ekki einu sinni stað­fest að þessi ferð hafi verið farin. Ég hef ekki grænan grun um hvað þú ert að tala. Spurðu þá fyrst, þessa ágætu drengi,“ segir Guðjón.

Enn eitt Isavia-málið

Rík­is­fyr­ir­tækið Isavia hefur nú ítrekað verið í fréttum vegna ýmissa mála. Skemmst er að minn­ast frétta­flutn­ings Kast­ljóss á dög­unum þar sem greint var frá því að fyr­ir­tækið hafi greitt fleiri hund­ruð þús­und krónur í ferða­lög eig­in­konu Björns Óla Hauks­sonar, for­stjóra Isavia. 

Við­skipta­blaðið greindi svo frá því að bíla­hlunn­indi væru ríf­lega tvær og hálfar millj­ónir á síð­asta ári. Tíu stjórn­endur hjá rík­is­fyr­ir­tæk­inu hafa bif­reið til afnota.

Uppsögn þriggja yfir­manna við örygg­is­deild Isavia hefur auk þessa verið gagn­rýnd harð­lega. Upp­sagn­irnar voru sagðar vera vegna skipu­lags­breyt­inga sem við nán­ari skoðun stenst ekki. Ásmundur Frið­riks­son, þing­maður Sjálf­stæð­is­flokks­ins, hefur gagn­rýnt þessar upp­sagnir.

„Þeir sátu einir á móti tveimur yfir­mönnum þegar þeim voru sögð ótíð­indin og muna varla orð af því sem sagt var vegna áfalls yfir frétt­unum. Trún­að­ar­maður var ekki boð­aður til stuðn­ings mönn­unum. Það er sárt að horfa á full­fríska menn bogna vegna harka­legra aðgerða yfir­manna sem hvergi þurfa að standa skil á verkum sínum. Fjöl­skyldur þeirra, börn og for­eldrar brotna, öryggi heim­il­is­ins hverfur og eftir sitja góðir menn í þoku von­leysis og kvíða. Á sama tíma líðst yfir­mönnum fyr­ir­tæk­is­ins að ganga hart fram í starfs­manna­málum og brjóta eigin reglur um sið­ferði og með­ferð fjár­muna fyr­ir­tæk­is­ins og mis­nota aðstöðu sína meðan vamm­lausum starfs­mönnum er sagt upp störfum án þess að hafa nokkuð til saka unnið,“ sagði Ásmundur í umræðu um störf þings­ins síð­ast­lið­inn þriðju­dag.

Við­skipta­blaðið greindi frá því upp­hafi mán­aðar að aðal­menn í stjórn Isavia fá hæst laun af stjórn­ar­mönnum opin­berra hluta­fé­laga á Íslandi. Aðalmenn stjórnar Isavia hafa 137 þús­und krónur í laun á mán­uði og stjórn­ar­for­maður um 300 þús­und krónur.