Tveimur húsvörðum hefur verið sagt upp hjá Ríkisútvarpinu og hefur þeim verið boðið að starfa fyrir Securitas í staðinn. Samkvæmt skipulagsbreytingum mun Ríkisútvarpið úthýsa hús- og öryggisvörslu um nætur og helgar.

Fimm húsverðir starfa hjá Rúv og verða tveir húsvarðanna áfram í vinnu á daginn. Sá fimmti hefur sagt upp störfum. Þeim tveimur sem er sagt upp býðst, samkvæmt heimildum Stundarinnar, að starfa hjá Securitas.

Ríkisstofnanir hafa í auknum mæli gripið til þess að úthýsa þjónustu. Í fyrra sagði Stjórnarráðið upp 17 ræstingakonum í hagræðingarskyni og buðu þjónustuna út. Að sögn Eflingar eru dæmi um að starfsmenn við ræstingar í Stjórnarráðinu séu undir lágmarkslaunum. 

Landspítalinn hefur einnig úthýst ræstingarþjónustu sinni. Í fyrra fækkaði spítalinn síðan ræstitæknum úr 25 í 12. Starfsmenn ræstifyrirtækisins Hreint kvörtuðu undan bágum kjörum og starfsaðstæðum í kjölfar þess. 

Vilhjálmur Birgisson, formaður Verkalýðsfélags Akraness, sagði á bloggsíðu sinni að það væri lítilmannlegt af ríkinu að spara á lægst launuðu starfsmönnum sínum með úthýsingu.

Samkvæmt heimildum Stundarinnar var haldinn starfsmannafundur í gær þar sem Magnús Geir Þórðarson útvarpsstjóri fór yfir batnandi horfur í rekstri Rúv.