Stjórnvöld hafa ekki sett sér formlega skilgreiningu á stafrænu fullveldi og tölvupóstkerfi ráðuneyta gæti lamast ef netsamband við útlönd rofnaði. Þetta kemur fram í svari utanríkisráðherra við þingfyrirspurn Þórdísar Kolbrúnar Reykfjörð Gylfadóttur, þingkonu Sjálfstæðisflokks og fyrrverandi utanríkisráðherra.

Ástæðan er sú að ráðuneytin, í gegnum UMBRA – þjónustumiðstöð Stjórnarráðsins, reiða sig að stórum hluta á skýjalausnir bandaríska tæknifyrirtækisins Microsoft sem eru reknar utan Íslands. Þar eru vistuð tölvupóstsamskipti, skjöl og önnur vinnugögn sem verða til í daglegum rekstri ráðuneytanna. Við alvarlegt rof á netsamgöngum við útlönd myndi aðgangur að þessari þjónustu falla niður.

Í svari sínu viðurkennir Þorgerður Katrín Gunnarsdóttir utanríkisráðherra að engin sameiginleg og formleg skilgreining á stafrænu fullveldi sé til staðar innan ráðuneytis síns. Þótt áhersla sé lögð á öryggi og yfirráð gagna í framkvæmd hefur ekki verið mótuð skýr stefna eða formlegt rammaverk um málaflokkinn.

Ráðherra bendir jafnframt á að afrit gagna séu varðveitt á Íslandi og að unnið sé að uppbyggingu varatengingar um gervihnött í samstarfi við Farice. Afrit af gögnum á skýjaþjónustum Microsoft séu geymd á Íslandi en „ljóst er þó að það myndi taka tíma að koma henni aftur að fullu í rekstur ef alvarleg röskun yrði“.