Druslugangan verður gengin í sjötta sinn þann 23. júlí næst komandi. Yfirlýst markmið göngunnar er að útrýma kynferðisofbeldi, styðja við þolendur þess og árétta að klæðnaður, hegðun og fas þolanda er aldrei afsökun fyrir slíkum glæpum. Í ár er kastljósinu sérstaklega beint að mikilvægi fyrirbyggjandi aðgerða, forvarna og fræðslu.
Þetta kemur fram í fréttatilkynningu frá skipuleggjendum göngunnar, en í fyrra tóku um 15 þúsund manns þátt. „Er það von skipuleggjenda að enn fleiri sýni þolendum kynferðisofbeldis stuðning í ár og gangi fyrir breyttu samfélagi,“ segir í tilkynningunni.
„Fólkið sem mætir í Druslugönguna er þverskurður íslensks samfélags. Í hana mætir fólk af öllum kynjum, á öllum aldri og sýna í verki samstöðu með þolendum kynferðisofbeldis. Með Druslugöngunni skapast einnig rými til að ræða við fólkið í kringum okkur. Tala við börnin okkar og fræða í nærumhverfi okkar. Aukin umræða er eina leiðin til að útrýma ofbeldinu sem hefur þrifist í þögninni allt of lengi.“
„Þögnin hefur verið rofin
af þúsundum einstaklinga“
Fram kemur að markmiðið sé ekki aðeins að hjálpa þeim sem orðið hafa fyrir ofbeldi heldur einnig að koma í veg fyrir kynferðisofbeldi í framtíðinni.
„Á síðustu árum hefur orðið gríðarleg vakning í samfélaginu um kynferðisofbeldi og afleiðingar þess. Þögnin hefur verið rofin af þúsundum einstaklinga sem hafa varpað ljósi á hversu gríðarlega stórt samfélagsvandamál kynferðisofbeldi er.“
Vona skipuleggjendur göngunnar að á næstu vikum bregðist samfélagið og stjórnvöld við þeirri meinsemd sem kynferðisofbeldi er með aukinni umræðu og aðgerðum. Til að vekja fólk til umhugsunar hafa verið búin til örskýringarmyndbönd með það að markmiði að fræða fólk, breyta orðræðunni og sporna gegn ofbeldi.
„Í myndböndunum útskýra Þorsteinn Bachman, Dóra Takefusa, Ævar vísindamaður, María Guðmundsdóttir, Stefán Gunnar Sigurðsson og Margrét Erla Maack hugtök sem oft vefjast fyrir fólki og fyrirbyggja ofbeldi með fræðslu. Reynt er eftir fremsta megni að útskýra hvers vegna baráttan gegn kynferðisofbeldi er mikilvæg og reynt að fyrirbyggja ofbeldi með fræðslu. Með myndböndunum vill Druslugangan leggja sitt af mörkum til að auka fræðslu og forvarnir og vekja athygli á mikilvægi þeirra. Það sem meðal annars er tekið fyrir er stafrænt kynferðisofbeldi, ofbeldi gegn körlum og druslusmánun.“
Einkennisorð druslugöngunnar í ár eru „Ég er ekki ofbeldið sem ég varð fyrir” og „Þú ert sama manneskjan fyrir mér”. Með þessu er tekið á algengri tilfinningu þolenda um breytta sín þeirra og annarra á sjálf sig eftir að hafa orðið fyrir ofbeldi og ítrekað að skömmin er ekki þolenda að bera.
„Við getum staðið upp og sýnt það í verki að við ætlum ekki að láta þetta ofbeldi yfir okkur ganga lengur og sýnt þolendum stuðning. Þess vegna boðum við til Druslugöngu 23. júlí klukkan 14:00 frá Hallgrímskirkju. Gengið verður í átt að Austurvelli þar sem við taka ræðuhöld og tónleikar. Við hvetjum alla til að mæta á sínum forsendum og ganga fyrir þolendur, aðstandendur, sjálfan sig og breyttu samfélagi,“ segir í tilkynningu skipuleggjenda.
Kynbundið ofbeldi
Rúm milljón kvenna og stúlkna hefur misst aðgang að mannúðaraðstoð
Ómenning að líta á kynferðisbrot sem „fórnarkostnað við skemmtun“
Þegar sáttameðferð framlengir ofbeldið
Árétta að meint kynferðisbrot er nú til lögreglurannsóknar
Stígamót: Réttarkerfið enn og aftur brugðist brotaþolum
Athugasemdir