Ökklabrotinn af bardagakappa í steggjun hjá Mjölni

Lárus Ósk­ars­son fast­eigna­sali var brot­inn á ökkla í steggjun sinni  af Árna „The Iceviking“ Ísaks­syni. Hann hefur stefnt bæði Mjölni, þar sem atvikið átti sér stað, og Árna sjálfum og fer fram á skaða­bætur.

Lárus segir í sam­tali við Stundina að ökkla­brotið hafi haft í för með sér umtals­verðan miska fyrir sig. Brúð­kaup­inu þurfti að fresta og var Lárus frá vinnu í nærri þrjá mán­uði. Hann seg­ist enn ekki búinn að ná sér eftir brotið en atvikið átti sér stað í lok síð­ast­lið­ins ágúst­mán­aðar. Málið verður tekið fyrir í Hér­aðs­dómi Reykja­víkur næst­kom­andi föstu­dag. „Þetta var snemma í dag­skránni svo það er ekki eins og maður hafi verið ofurölvi,“ segir Lárus.

„Innan tveggja mín­úta frá því að ég fór inn í hring­inn var hann búinn að brjóta á mér löpp­ina.“

Beinbrotinn á innan við tveimur mínútum

Lárus segir að ferð í Mjölni hafi verið eitt það fyrsta á dag­skrá í steggj­un­inni. Hann hafi þó ekk­ert vitað þar sem steggj­unin var óvissu­ferð líkt og gengur og ger­ist. „Þar í Mjölni tekur á móti okkur ein­hver starfs­maður hjá Mjölni sem fer með mig í hring­inn. Innan tveggja mín­úta frá því að ég fór inn í hring­inn var hann búinn að brjóta á mér löpp­ina. Það var ökklinn sem brotn­aði. Þetta var mjög slæmt brot, ég er með plötu í löpp­inni með fjórum skrúfum. Svo er ég líka með tvo nagla í löpp­inni. Hann tók ein­hverja fellu á mig þannig að það sner­ist illa upp á fót­inn, sem marg­brotn­aði,“ segir Lárus. Hann segir að bein­brotið hafi verið veru­lega sárs­auka­fullt.

Með þeim betri á Íslandi í MMA

Ekki náð­ist í Árna Ísaksson við vinnslu fréttar. Árni er utan Gunnars Nelson meðal bestu Íslend­inga í MMA, eða blönd­uðum bar­daga­listum. Hann var enn fremur Íslands­meist­ari í ólymp­sku boxi árið 2009. Hann er meðal kenn­ara í Mjölni sam­kvæmt heima­síðu félags­ins.

„Fyrir mér er þetta algjör­lega frá­leitt mál“

Haraldur Dean Nelson, fram­kvæmda­stjóri Mjölnis, vildi sem minnst tjá sig um málið í sam­tali við Stundina. „Við lítum svo á að við höfum ekki aðkomu að mál­inu. Þarna er um að ræða stráka sem koma og biðja um að fá ein­hvern til að steggja sig. Við höfum aldrei verið með svona steggjarnir á okkar vegum. Þeir koma og leigja sal­inn af okkur. Fyrir mér er þetta algjör­lega frá­leitt mál,“ segir Haraldur.

Lárus og eig­in­kona hans Lárus ætl­aði að gifta sig í sept­em­ber en þurfti að fresta því fram í nóv­em­ber vegna fót­brots­ins.

Þurfti að blása af brúðkaupið

Lárus segir að ökkla­brotið haft í för með sér tals­verðan miska. „Ég var frá vinnu heil­lengi, tvo eða tvo og hálfan mánuð. Maður gat nátt­úr­lega lítið hreyft sig. Ég átti að gifta mig 13. sept­em­ber og þetta ger­ist 27. ágúst, minnir mig. Það þurfti að blása það allt af og end­ur­skipu­leggja,“ segir Lárus. Hann segir að brúð­kaupið hafi verið búið að skipu­leggja í þaula á þessum tíma­punkti. „Það var búið að eyða alveg gríð­ar­lega miklu púðri í þetta. Konan mín er fædd og upp­alin í Svíþjóð þannig að það var fólk að koma þaðan sem var búið að bóka flug. Við höfðum fengið veislu­stjóra og tón­list­ar­at­riði, og allt þetta,“ segir Lárus. Hann og kona hans giftu sig þó að lokum í nóv­em­ber.

„Ég að láta hengja mig fyrir eitthvað myndband“

Lárus gagn­rýnir við­brögð Árna strax í kjöl­far þess að hann var tek­inn niður. „Eftir á að hyggja er ég mjög ósáttur við þetta því þetta er kenn­ari þarna hjá Mjölni sem brýtur á mér löpp­ina. Þegar ég fell þarna niður þá segi ég við hann að hann hafi brotið á mér löpp­ina. Hann var sjokker­aður, því þetta er örugg­lega góður drengur, en það var röð hluta þarna sem manni finnst mjög skrítin. Hann spyr strák­anna sem voru með mér hvort að þeir vilji það ekki á mynd­bandi þegar hann er að hengja mig. Ég er þarna í ein­hverju sjokki og veit ekk­ert hvað ég á að gera, hvort ég sé fót­brot­inn eða hvað, þá er ég að láta hengja mig fyrir eitt­hvað mynd­band,“ segir Lárus. Með öðrum orðum þá tók Árni Lárus í háls­tak eftir að hann var búinn að brjóta á sér fót­inn og lét hann gef­ast upp. „Dag­skráin hélt bara áfram,“ segir Lárus.