Alkóhól veldur krabbameini á sjö mismunandi stöðum líkamans, og jafnvel einstaklingar sem neyta lítils til miðlungs magns eru í hættu, samkvæmt nýrri rannsókn. Sérfræðingar á sviði heilbrigðismála í Bretlandi staðfesta niðurstöðurnar og viðurkenna alvarleika hennar. Segja þeir að stjórnvöld ættu að gera meira til þess að vekja athygli á þeim til þess að takast á við það hversu lítið almenningur veit um hin nánu tengsl milli áfengisnotkunar og tíðni krabbameins. Rannsóknin hefur einnig valdið því víða að dagdrykkjufólk er hvatt til þess að taka áfengislausa daga, og að umbúðir alkóhóls beri sérstök viðvörunarmerki þar sem bent er á hættuna sem fylgir neyslunni. 

„Konur sem drekka tvær einingar á dag 16% líklegri til þess að fá brjóstakrabbamein.“

Nýjar niðurstöður og gögn sem safnað hefur verið undanfarin ár benda á aukna tíðni á milli áfengisneyslu og krabbameins í brjóstum, lifur og öðrum stöðum líkamans. Rannsóknin, sem birtist í vísindaritinu Addiction, segir í niðurstöðum sínum að það sé of mikil tíðni milli áfengisneyslu og krabbameins til þess að eitthvað annað geti útskýrt það. Fullyrða vísindamenn að nægar sannanir séu fyrir því að fullyrða að drykkja sé bein orsök sjúkdómsins. Einn rannsakendanna, Jennie Connor frá Otago háskólanum í Nýja-Sjálandi, segist áætla að áfengi hafi valdið dauða hálfrar milljónar krabbameinssjúklinga árið 2012, sem jafngilda 5,8% allra andláta af völdum krabbameins á heimsvísu. Þeir sem stunda mikla drykkju eru í mestri hættu, en jafnvel fólk sem drekkur lítið eykur líkurnar á sjúkdómnum.

Óheiðarlegt að segja rauðvín hollt

Niðurstöður hennar tengja áfengisneyslu við krabbamein í munni og hálsi, barkakýli, vélinda, lifur, ristli, þörmum og brjóstum. „Það eru sterkar sannanir fyrir því að alkóhól valdi krabbameini á sjö stöðum og líklega fleiri. Staðfesting á nákvæmum líffræðilegum þáttum þess að alkóhól eykur líkurnar á því að krabbamein myndist eru ekki þarfar til þess að sjá að alkóhól er orsökin.“

Sagði hún að miðað við þær sannanir sem hún hefði undir höndum væri ekkert öruggt magn áfengisdrykkju þegar kemur að krabbameini, en að líkurnar á því minnkuðu í einhverjum tilfellum um leið og fólk hætti að drekka. Bætti hún því við að svokallaður heilsufarslegur ávinningur af því að drekka, eins og að rauðvín væri gott fyrir hjartað, væri álitinn óheiðarlegur og málinu óviðkomandi þegar litið er til þess að það auki einni líkurnar á krabbameini.

Niðurstöðurnar sýna að sé miðað við fólk sem ekki drekkur, eru konur sem drekka tvær einingar á dag 16% líklegri til þess að fá brjóstakrabbamein og deyja úr því. Þær sem drekka 5 einingar 40% líklegri.

Af hverjum 1000 konum sem ekki drekka munu 109 fá brjóstakrabba. Sú tala hækkar upp í 126 fyrir þær konur sem drekka 14 einingar eða minna á viku og í 153 konur ef drykkjan er 14 til 35 einingar á viku. Ein áfengiseining er 10 millilítrar eða 8 grömm af alkóhóli. Þetta samsvarar 25 ml af viskí, þriðjungi af einum bjór eða hálfu rauðvínsglasi.

Vísindamennirnir eru enn að rannsaka nákvæmlega hvernig áfengið veldur krabbameininu, en ein kenningin er sú að það skaði DNA, sem komi þá í veg fyrir að frumur geti fjölgað sér á eðlilegan hátt.

Heimildir:
Umfjöllun vísindaritsins Addiction

Frétt The Guardian um málið