„Þetta segir okkur talsvert um vandann sem fylgir þauleldi,“ segir Hallgerður Hauksdóttir, formaður Dýraverndarsambands Íslands, um neyðarástandið sem nú ríkir í svína- og alifuglabúum. Fréttablaðið og Morgunblaðið fjalla bæði um neyðarástand á svínabúum á forsíðum blaðanna í dag. Ástandið er til komið vegna verkfalls dýralækna í BHM en þéttleiki og þrengsli í svínabúum eru víða orðin meiri en lög gera ráð fyrir. Hallgerður segir reglugerðirnar um velferð svína og alifugla þannig upp byggðar að í rauninni megi ekkert megi upp á. „Það er eiginlega það sem við erum að reka okkur á núna,“ segir hún. 

„Þær reglugerðir sem eru settar um þessi dýr eru um lágmarksvelferð og þegar þær eru nýttar til fulls þá birtist þessi vandi mjög fljótt. Það er mitt mat að til dæmis sauðfjárbóndi, sem hefði þurft að hinkra með sín lömb í nokkrar vikur til eða frá, hefði haft betri úrræði,“ segir Hallgerður. Hún segist til að mynda vita um svínabónda sem hefur ekki nýtt til fulls það svigrúm sem reglugerðirnar leyfa og þar ríkir ekki sama neyðarástand og hjá öðrum aðilum. Það sama eigi við um alifugla. 

Þéttleiki of mikill

Samkvæmt núgildandi reglugerð um velferð alifugla má hámarksþéttleiki fugla ekki fara yfir 33 kíló á fermetra. Mætvælastofnun getur hins vegar veitt undanþágu fyrir auknum þéttleika allt að 39 kíló á fermetra í eldishúsum. Þessar undanþágur voru harðlega gagnrýndar, meðal annars af dýralæknum, þegar reglugerðirnar voru lagðar fram á síðasta ári. 

 „Þeir aðilar sem halda þessi bú töluðu um að ástandið væri orðið alvarlegt í þeim húsum þar sem hámarksþéttleiki væri nýttur, sem er 39 kíló á fermetra, en voru ekki svo stressaðir yfir húsunum sem voru með vistvænu yfirbragði þar sem 25 kíló á fermetra er hámarkið,“ segir Hallgerður. „Þess má geta að Dýraverndarsambandið, þegar það veitti umsagnir um reglugerðirnar, þá lögðum við til 25 kílóa hámarksþéttleika á fermetra í alifuglahúsum vegna þess að það hefur verið sýnt fram á með rannsóknum að bæði streituvandi og sjúkdómavandi liggur við þessi mörk,“ bætir hún við. 

Dýralæknar sýni dýrunum virðingu