Lögreglan á höfuðborgarsvæðinu óskar eftir að ná tali af ökumanni hvíta bílsins, sem var ekið vestur Óseyrarbraut í Hafnarfirði laugardaginn 14. janúar kl. 12.24. Þetta kemur fram í fréttatilkynningu frá lögreglu sem send var fjölmiðlum nú rétt í þessu. Tengist þetta rannsókn lögreglu á hvarfi Birnu Brjánsdóttir en hún hvarf sporlaust aðfaranótt laugardagsins 14. janúar.

Lögreglan tekur skýrt fram í fréttatilkynningunni að ökumaðurinn er ekki grunaður um neitt misjafnt, en hann gæti hugsanlega búið yfir upplýsingum sem kunna að nýtast lögreglu við rannsókn máls Birnu Brjánsdóttur.

Viti aðrir deili á bifreiðinni og ökumanni hennar eru hinir sömu beðnir um að koma þeim upplýsingum til lögreglu í síma 444 1000, í einkaskilaboðum á fésbókarsíðu Lögreglunnar á höfuðborgarsvæðinu eða í tölvupósti á netfangið abending@lrh.is

Samkvæmt heimildum Stundarinnar gæti ökumaðurinn búið yfir mikilvægri vitneskju sem gæti hjápað til við að púsla saman ferðum rauða Kia Rio-bílaleigubílsins sem var leigður af áhafnarmeðlimi Polar Nanoq, þeim sama og nú situr í gæsluvarðhaldi ásamt öðrum skipverja. Þeir voru úrskurðaðir í tveggja vikna gæsluvarðhald en þeirri niðurstöðu hefur lögreglan áfrýjað til Hæstaréttar Íslands. Krafa lögreglu var gæsluvarðhald í fjórar vikur.

Sá þriðji situr einnig í gæsluvarðhaldi en hann er grunaður um stórfellt eiturlyfjasmygl en um 20 kíló af hassi fundust um borð við leit lögreglu- og tollgæslu. Hann var dæmdur í gæsluvarðhald fram á mánudag.

ENGLISH

The driver of the white car, driven west on Óseyrarbraut in Hafnarfjordur last Saturday at 12.24, is asked to come forward and contact the police as he might have information regarding a missing person case, in which 20 y.o. Birna Brjansdottir went missing.

The number for police is 444 1000, messages through abending@lrh.is and private messages on the Reykjavik Metropolitan Police Facebook site.