Gústaf Níelsson, sem gerður var aft­ur­reka sem vara­maður í mann­réttinda­ráði Reykja­vík­ur­borgar, dró upp þá sam­lík­ingu í þætt­inum Bítinu á Bylgj­unni í morgun, að múslímar á Íslandi væru í svip­aðri stöðu og ofbeld­is­menn á heim­ilum. Íslenskir stjórn­mála­menn væru í hlut­verki hins kúg­aða og tipluðu á tánum í kringum ofbeld­is­fólkið.

„Það sem mér finnst sér­kenni­leg­ast er að stjórn­mála­menn allra flokka tipla á tánum í kringum þetta fólk, svona af ótta við við­brögðin. Stjórn­mála­menn­irnir eru í reynd­inni eins og kona í ofbeld­is­sam­bandi sem tiplar á tánum í kringum ofbeld­is­mann­inn af ótta við hin óvæntu við­brögð hans. Við þetta er ekk­ert búandi,“ sagði Gústaf í útvarps­þætt­inum Bítinu á Bylgj­unni í morgun þar sem hann sat einn fyrir svörum hlust­enda.

Um tíma hitn­aði í kol­unum þegar einn hlust­enda sagði vera sam­svörun milli skoðan Gústafs og norska fjöldamorð­ingj­ans Anders Behring Breivik. Gústaf varð­ist og sagð­ist ekki deila sjón­ar­miðum með „þessum ógæfu­manni“.

Gústaf var einnig í umræðu­þætti á Stöð 2 í gær­kvöld þar sem hann reif­aði skoð­anir sínar á múslímum sem hann segir að streymi til Vestur-Evrópu vegna þess að þeirra eigin lönd séu í upp­lausn.