Hannes Hólmsteinn Gissurarson, prófessor í stjórnmálafræði við Háskóla Íslands og einn helsti hugmyndafræðingur Sjálfstæðisflokksins á árunum fyrir hrun, furðast að Píratar fái jafn mikið fylgi í skoðanakönnunum og raun ber vitni. Fullyrðir hann að Píratar finni ekki til neinnar ábyrgðar fyrir hönd þjóðarinnar.

„Ég skil að vísu, að margir séu ófúsir í skoðanakönnunum til að lýsa yfir stuðningi við vinstri flokkana (Icesave-flokkana tvo og Bjarta fortíð),“ skrifar hann á Facebook og bætir við: „Hitt þykir mér furðulegt, að menn lýsi þess í stað yfir stuðningi við Pírata, sem hafa enga stefnu, nenna ekki að mæta á þingfundi eða taka þátt í þingstörfum og finna ekki til neinnar ábyrgðar fyrir hönd þjóðarinnar, heldur reika inn og út af þingi eftir eigin hentisemi.“ 

Birgitta Jónsdóttir Kapteinn Pírata.

Mynd: Kristinn Magnússon

Samkvæmt nýrri könnun MMR eru Píratar með mest fylgi allra flokka á Íslandi, eða 33,2 prósent. Eykst fylgi þeirra um eitt prósentustig frá síðustu könnun.

Fylgi Pírata hefur aukist jafnt og þétt undanfarna mánuði. Um leið verður flokkurinn fyrir æ meiri gagnrýni af hálfu sjálfstæðismanna og framsóknarmanna. Í forsíðuviðtali DV við Sigmund Davíð Gunnlaugsson, forsætisráðherra, í júní gaf hann í skyn að Píratar væri byltingarflokkur og sagði þá ógna rótgrónum íslenskum gildum.